ఆస్ట్రేలియా యువతికి భారత యువకుడి లవ్ ప్రపోజల్

     Written by : smtv Desk | Mon, Nov 30, 2020, 08:19 AM

ఆస్ట్రేలియా యువతికి భారత యువకుడి లవ్ ప్రపోజల్

సిడ్నీ వేదికగా ఆస్ట్రేలియాతో జరిగిన రెండో మ్యాచ్‌లోనూ భారత్ ఓటమిపాలైంది. ముందుగా బ్యాటింగ్ చేసిన ఆస్ట్రేలియా 4 వికెట్ల నష్టానికి 389 పరుగుల భారీ స్కోరు చేయగా.. భారత్ 9 వికెట్ల నష్టానికి 338 పరుగులే చేసింది. దీంతో ఆసీస్ 51 పరుగుల తేడాతో గెలుపొందింది. వరుసగా రెండు మ్యాచ్‌ల్లో గెలిచిన ఆసీస్.. మరో మ్యాచ్ మిగిలి ఉండగానే సిరీస్‌ను కైవసం చేసుకుంది. వరుసగా రెండు మ్యాచ్‌ల్లో టీమిండియా ఓడిపోవడం.. భారత ఫ్యాన్స్‌కు నిరాశ కలిగించింది. కానీ రెండో వన్డే సందర్భంగా చోటు చేసుకున్న ఓ లవ్ ప్రపోజల్ ఫ్యాన్స్కు కాసింత ఊరటనిచ్చింది.

భారత జట్టు బ్యాటింగ్ చేస్తుండగా.. స్టేడియంలో ఉన్న అభిమానుల్లో.. టీమిండియా జెర్సీలో ఉన్న ఇండియన్ యువకుడు ఒకరు.. ఆస్ట్రేలియా జెర్సీలో ఉన్న ఆ దేశ యువతికి ప్రపోజ్ చేశాడు. మోకాలిపై నిలబడి యువతికి ఉంగరం ఇచ్చి ప్రపోజ్ చేయగా.. ఆమె సంతోషంగా అంగీకరించింది. తర్వాత ఒకరినొకరు హత్తుకొని ప్రేమను వ్యక్తం చేయగా.. పక్కనే ఉన్న క్రికెట్ ఫ్యాన్స్ వారిని ఉత్సాహపరిచారు.

మ్యాచ్ జరుగుతుండగా.. ఇండియన్ యువకుడు ఆస్ట్రేలియా యువతికి లవ్ ప్రపోజ్ చేయడాన్ని గమనించిన ఆసీస్ క్రికెటర్ గ్లెన్ మ్యాక్స్‌వెల్ నవ్వుతూ... చప్పట్లతో వారిని అభినందించాడు. స్టేడియంలో ఈ ప్రేమ ప్రపోజల్‌కు సంబంధించిన వీడియో సోషల్ మీడియాలో వైరల్‌గా మారింది.





Untitled Document
Advertisements