గంగూలీ ఆరోగ్యంపై మాజీ ప్రియురాలు నగ్మా ట్వీట్

Written by : smtv Desk | Mon, Jan 04, 2021, 04:01 PM

భారత మాజీ కెప్టెన్ సౌరవ్ గంగూలీ త్వరగా కోలుకోవాలని సినీ, రాజకీయ, క్రీడా ప్రముఖులు ఆకాంక్షిస్తూ వరుసగా ట్వీట్స్ చేస్తున్నారు. కోల్‌కతాలోని తన ఇంటిలో శనివారం ఉదయం జిమ్‌లో గంగూలీ వ్యాయమం చేస్తుండగా.. అతని ఛాతిలో భరించలేని నొప్పి వచ్చినట్లు కుటుంబ సభ్యులు తెలిపారు. దాంతో.. హుటాహుటిన కోల్‌కతాలోని ఉడ్‌ల్యాండ్స్ ఆసుపత్రికి గంగూలీని తరలించగా.. హార్ట్ ఎటాక్ వచ్చినట్లు వైద్యులు ధ్రువీకరించారు.

సౌరవ్ గంగూలీకి ఈరోజు యాంజియో‌ప్లాస్టీ చేసినట్లు తెలిపిన డాక్టర్ ఆప్తాబ్ ఖాన్.. 24 గంటలు పర్యవేక్షణలో ఉంచుకోనున్నట్లు స్పష్టం చేశారు. ప్రస్తుతం అతని ఆరోగ్యం కూడా నిలకడగానే ఉందని.. సోమవారం మరోసారి సమీక్షించిన తర్వాత డిశ్చార్జ్‌పై తుది నిర్ణయం తీసుకుంటామని డాక్టర్ ఆప్తాబ్ వెల్లడించారు. అంతేకాకుండా గంగూలీ ఆరోగ్యం గురించి ప్రస్తుతం భయపడాల్సింది ఏమీ లేదని.. అతను యాక్టివ్‌గా అక్కడ ఉన్న వారితో మాట్లాడుతున్నాడని డాక్టర్ స్పష్టం చేశారు.

సౌరవ్ గంగూలీ త్వరగా కోలుకోవాలని ఒకప్పటి అతని సహచర క్రికెటర్ సచిన్ టెండూల్కర్‌ ట్వీట్ చేయగా.. పశ్చిమ బెంగాల్ ముఖ్యమంత్రి మమతా బెనర్జీ కూడా దాదా త్వరగా కోలుకోవాలని ఆకాంక్షించారు. ఇక ఒకప్పటి అతని ప్రియురాలు, సినీ నటి, ప్రస్తుతం కాంగ్రెస్ నాయకురాలు నగ్మా కూడా గంగూలీ త్వరగా కోలుకోవాలని కాంక్షిస్తూ ట్వీట్ చేశారు. గంగూలీ క్రికెట్ ఆడే రోజుల్లో నగ్మాతో కలిసి చెట్టాపట్టాలేసుకుని తిరిగినట్లు వార్తలు వచ్చాయి. ఈ ఇద్దరూ చిత్తూరు జిల్లాలోని శ్రీకాళహస్తిలో పూజలు చేసినట్లు అప్పట్లో కొన్ని ఫొటోలు కూడా వెలుగులోకి వచ్చాయి. కానీ.. తాము మంచి ఫ్రెండ్స్ అని నగ్మా అప్పట్లో చిన్న వివరణతో సరిపెట్టింది.