సంపత్ రాజ్ గురించి ఈ విషయాలు తెలుసా?!

హ్యాండ్‌సమ్ విలన్‌గా తెలుగు ప్రేక్షకులకు దగ్గరైన నటుడు సంపత్ రాజ్. తమిళంలో సుమారు 50 సినిమాల్లో నటించిన తరవాత ఈయన టాలీవుడ్‌కు పరిచయం అయ్యారు. పవన్ కళ్యాణ్ ‘పంజా’ సినిమాలో నటించారు. ఆ తరవాత ‘దమ్ము’లో నటించారు. కానీ, సంపత్‌కు మంచి గుర్తింపు తెచ్చిన చిత్రం మాత్రం ‘మిర్చి’. ఈ సినిమాకు ఉత్తమ విలన్‌గా నంది అవార్డు కూడా అందుకున్నారు సంపత్. ప్రస్తుతం తెలుగు, తమిళం, కన్నడలో వరుస సినిమాలో బిజీ ఆర్టిస్టుగా మారిపోయారు. కిందటేడాది ‘భీష్మ’ సినిమాలో ఏసీపీ దేవాగా కామెడీ చేసి నవ్వించారు.

ఇదిలా ఉంటే, సంపత్ వ్యక్తిగత జీవితం గురించి చాలా తక్కువ మందికే తెలుసు. నిజానికి సంపత్ ప్రముఖ తమిళ నటి శరణ్య పొన్వన్నన్ మొదటి భర్త. ఈ విషయాన్ని ఆయనే ఆ మధ్య ఓ ఇంటర్వ్యూలో చెప్పారు. డైరెక్టర్ ఎ.బి.రాజ్ కుమార్తె అయిన శరణ్యకు 19 ఏళ్ల వయసులో సంపత్‌తో వివాహం జరిగింది. అప్పటికి సంపత్ వయసు 23 ఏళ్లు. ఇది పెద్దలు కుదిర్చిన వివాహం. అయితే, పెళ్లయిన కొన్నేళ్లకే వీరు విడాకులు తీసుకున్నారు. దీనికి కారణాన్ని కూడా సంపత్ చెప్పుకొచ్చారు.

చిన్న వయసులో తమకు పెళ్లి జరిగిందని.. వయసు పెరుగుతున్న కొద్దీ తమ ఆలోచనల్లో తేడాలు వచ్చాయని సంపత్ అన్నారు. ఈ దాంపత్య జీవితాన్ని ఇలాగే కొనసాగిస్తే తమ మధ్య మనస్పర్థలు వస్తాయని భావించి ఇద్దరి సమ్మతితోనే విడిపోయామని ఆయన వెల్లడించారు. అయితే, కూతురిని తన వద్దే ఉంచేసుకున్నానని వెల్లడించారు. శరణ్యతో విడాకులు తీసుకున్న తరవాతే తాను సినిమాల్లో బాగా బిజీ అయిపోయానని.. ఈ విషయంలో ఆమెకు ఎప్పుడూ థ్యాంక్స్ చెబుతూనే ఉంటానని అన్నారు. ఇప్పటికీ తన కూతురు తల్లిని కలుస్తూ ఉంటుందని వెల్లడించారు.

సినిమా షూటింగ్‌లతో బిజీగా ఉండటంతో తన కుమార్తెను బోర్డింగ్ స్కూల్‌లో చేర్పించానని.. తనకు తెలియకుండానే కూతురు పెద్దదైపోయిందని అన్నారు. కూతురు కూడా టీనేజ్‌కు రావడంతో తాను పెళ్లిచేసుకోలేదని.. ఆమె బాగోగులు చూసుకుంటూ ఉండిపోయానని తెలిపారు. అయితే, శరణ్య మాత్రం రెండో పెళ్లి చేసుకున్నారు. తమిళ నటుడు పొన్వన్నన్‌ను 1995లో పరిణయమాడారు. వీరికి ఇద్దరు ఆడపిల్లలు సంతానం. శరణ్య కూడా తెలుగు ప్రేక్షకులకు సుపరిచితమే. ‘రాఖీ’, ‘జగడం’, ‘రెడీ’, ‘వేదం’, ‘కొమరం పులి’, ‘మనం’, ‘నానీస్ గ్యాంగ్ లీడర్’ చిత్రాల్లో ఆమె మంచి పాత్రలు పోషించారు.