యంగ్ హీరో తేజ సజ్జాతో ప్రియా ప్రకాష్ ‘ఇష్క్’

Written by : smtv Desk | Fri, Jan 08, 2021, 06:49 PM

సోషల్ మీడియాలో వైరల్ అయిన ఒకే ఒక్క క్లిప్‌తో నేషనల్ వైడ్ పాపులర్ అయిన యువ నటి ప్రియా ప్రకాష్ వారియర్. కన్ను గీటి కుర్రకారును తన వలలో వేసేసుకుంది. ‘ఒరు అదార్ లవ్’ అనే మలయాళ సినిమాతో వెండితెరకు పరిచయమైన ప్రియాంక.. తెలుగు ప్రేక్షకులకూ దగ్గరైంది. ఈ సినిమాను తెలుగులోకి అనువాదం చేసి ‘లవర్స్ డే’గా విడుదల చేశారు. సినిమా ఆడకపోయినా ప్రియాంకకు మాత్రం మన కుర్రాళ్లు ఫిదా అయిపోయారు.

ఇదిలా ఉంటే, ప్రియాంకకు ప్రస్తుతం తెలుగులో అవకాశాలు పెరుగుతున్నాయి. ఇప్పటికే ఆమె నితిన్ సినిమాలో నటిస్తుండగా ఇప్పుడు మరో సినిమా ఛాన్స్ ఆమెను వరించింది. అది కూడా మెగా సూపర్ గుడ్ ఫిలింస్ వంటి ప్రతిష్టాత్మక సంస్థ నిర్మిస్తోన్న చిత్రంలో కావడం విశేషం. టాలీవుడ్‌లో ప‌లు బ్లాక్‌ బ‌స్టర్ ఫిలిమ్స్ అందించిన మెగా సూప‌ర్ గుడ్ ఫిలిమ్స్ 2021లో త‌న తొలి చిత్రంతో మళ్లీ తెలుగులోకి వ‌స్తోంది.
ప్రస్తుతం ప‌లు చిత్రాల‌తో బిజీగా మారిన యంగ్ హీరో తేజ స‌జ్జా ఈ చిత్రంలో క‌థానాయ‌కుడిగా న‌టించ‌నుండ‌గా.. ప్రియా ప్రకాష్ వారియ‌ర్ నాయిక‌గా న‌టించ‌నున్నారు. య‌స్‌.య‌స్‌.రాజు ద‌ర్శక‌త్వం వ‌హించే ఈ చిత్రానికి ఆర్‌.బి. చౌద‌రి స‌మ‌ర్పకులుగా వ్యవ‌హ‌రిస్తుండ‌గా.. ఎన్వీ ప్రసాద్‌, పార‌స్ జైన్‌, వాకాడ అంజ‌న్ కుమార్ నిర్మాతలు.

ఈ చిత్రానికి ‘ఇష్క్’ అనే టైటిల్ ఖ‌రారు చేశారు. ‘నాట్ ఎ ల‌వ్ స్టోరీ’ అనేది ట్యాగ్‌లైన్‌. ఈ మేరకు టైటిల్ పోస్టర్‌ను తేజ ఇన్‌స్టాగ్రామ్ ద్వారా శుక్రవారం షేర్ చేశారు. టైటిల్ ప్రకారం ఈ మూవీ రొమాంటిక్ ఎంట‌ర్‌టైన‌ర్ అనే అభిప్రాయం క‌లుగుతుండ‌గా.. ట్యాగ్‌లైన్ మ‌రో అభిప్రాయాన్ని క‌లిగిస్తూ ఆస‌క్తిని రేకెత్తిస్తోంది. ఈ చిత్రానికి మ‌హ‌తి స్వర‌ సాగ‌ర్ సంగీతం స‌మ‌కూరుస్తుండ‌గా.. శ్యామ్ కె. నాయుడు సినిమాటోగ్రాఫ‌ర్‌. శ్రీ‌మ‌ణి పాట‌లు రాస్తున్నారు. ఎ. వ‌ర‌ప్రసాద్ ఎడిట‌ర్‌గా, విఠ‌ల్ కొస‌నం ఆర్ట్ డైరెక్టర్‌గా వ‌ర్క్ చేస్తున్నారు. త్వర‌లో మ‌రిన్ని వివ‌రాల‌ను చిత్ర బృందం వెల్లడించ‌నుంది.