డొనాల్డ్‌ ట్రంప్‌కు కోర్టు అరెస్ట్ వారెంట్ జారీ

Written by : smtv Desk | Sat, Jan 09, 2021, 12:01 PM

అమెరికా అధ్యక్షుడు డొనాల్డ్‌ ట్రంప్‌ను అరెస్ట్ చేయాలంటూ ఇరాక్‌లోని బాగ్దాద్ కోర్టు అరెస్ట్ వారెంట్ జారీ చేసింది. పారామిలిటరీ కమాండర్‌ అబు అల్‌ ముహందిస్‌ హత్య కేసులో ఈ మేరకు ఆదేశాలు ఇచ్చింది. ఇరాక్‌ శిక్షాస్మృతిలోని ఆర్టికల్‌ 406 ప్రకారం ట్రంప్‌ను అరెస్టు చేసేందుకు వారెంట్‌ జారీ చేసినట్లు బాగ్దాద్‌ న్యాయస్థానం స్పష్టం చేసింది. ఈ కేసులో ముహందిస్‌ కుటుంబసభ్యుల నుంచి వాంగ్మూలాన్ని రికార్డు చేసిన తర్వాతే ఈ వారెంటు జారీ చేస్తున్నట్లు ధర్మాసనం తెలిపింది.

2020 జనవరి 3న ఇరాక్‌పై అమెరికా డ్రోన్‌ దాడి చేసింది. బాగ్దాద్ ఎయిర్‌పోర్టు సమీపంలో చేసిన బాంబు దాడిలో ఇరాన్‌ మేజర్‌ జనరల్‌ ఖాసిం సులేమానీ, ఇరాక్‌ పారామిలిటరీ కమాండర్‌ అబు అల్‌ ముహందిస్‌ మరణించారు. అమెరికా అధ్యక్షుడు డొనాల్డ్ ట్రంప్‌ ఆదేశాలతోనే వారిని హత్య చేసినట్లు తెలియడంతో ఇరాన్‌ ఈ ఘటనపై తీవ్రంగా స్పందించింది.

అమెరికాపై కచ్చితంగా ప్రతీకారం తీర్చుకుంటామని ఇరాక్ గతంలోనే హెచ్చరికలు చేసింది. సులేమానీ హత్య కేసులో ఇరాన్‌ న్యాయస్థానం ఇప్పటికే ట్రంప్‌ను అరెస్ట్‌ చేయాలని ఆదేశించింది. గత జూన్‌లో ఇంటర్‌పోల్‌ వారెంటు జారీ చేసింది.

ఇక ఇరాక్ పారామిలిటరీ కమాండర్ ముహందిస్‌ హత్య కేసులో ఇప్పటికే ప్రాథమిక విచారణ ముగిసింది. ఈ విచారణలో భాగంగా డొనాల్డ్ ట్రంప్‌ అరెస్టుకు ఆదేశాలు జారీ చేసింది. ఇంకా ఈ కేసుతో సంబంధం ఉన్న ఇరాకీలు, ఇతర విదేశీయులను గుర్తించడానికి దర్యాప్తు కొనసాగుతోందని బాగ్దాద్ కోర్టు తెలిపింది.