చెన్నై ప్రాక్టీస్ సెషన్‌లో ధోనీ సిక్సర్ల వర్షం

Written by : smtv Desk | Wed, Apr 07, 2021, 01:31 PM

ఐపీఎల్ 2021 సీజన్‌ ముంగిట మహేంద్రసింగ్ ధోనీ మంచి జోరుమీద ఉన్నట్లు కనిపిస్తోంది. ఏప్రిల్ 9 నుంచి మే 30 వరకూ ఐపీఎల్ 2021 సీజన్ మ్యాచ్‌లు జరగనుండగా.. ఏప్రిల్ 10న వాంఖడే స్టేడియం వేదికగా ఢిల్లీ క్యాపిటల్స్‌తో తన ఫస్ట్ మ్యాచ్‌ని చెన్నై సూపర్ కింగ్స్ ఆడనుంది. ఈ మేరకు ఇప్పటికే ముంబయికి చేరిన చెన్నై టీమ్.. ప్రాక్టీస్ కూడా చేస్తోంది.

చెన్నై సూపర్ కింగ్స్ ప్రాక్టీస్ సెషన్‌లో మహేంద్రసింగ్ ధోనీ భారీ షాట్లు ఆడుతూ కనిపించాడు. స్పిన్నర్ల బౌలింగ్‌లో క్రీజు వెలుపలికి వచ్చి హిట్టింగ్ చేసిన ధోనీ.. ఒకానొక దశలో ఒంటిచేత్తో బంతిని స్టాండ్స్‌లో పడేలా కొట్టేశాడు. సాధారణంగా ధోనీ అలా ఒంటిచేత్తో షాట్ ఆడటం చాలా అరుదు. కానీ.. జూనియర్ ధోనీగా పేరొందిన రిషబ్ పంత్ మాత్రం అలా ఒంటిచేత్తో తరచూ సిక్సర్లు బాదుతుంటాడు. ఢిల్లీ క్యాపిటల్స్ రెగ్యులర్ కెప్టెన్ శ్రేయాస్ అయ్యర్ గాయపడగా.. ఐపీఎల్ 2021 సీజన్‌లో ఢిల్లీ టీమ్‌ని కెప్టెన్‌గా రిషబ్ పంత్ నడిపించబోతున్నాడు. దాంతో.. మహేంద్రసింగ్ ధోనీ, రిషబ్ పంత్ కెప్టెన్లుగా ఢీకొట్టబోతున్నారు. ఐపీఎల్ 2020 సీజన్‌లో ఢిల్లీ క్యాపిటల్స్ ఫైనల్‌కి చేరగా.. చెన్నై సూపర్ కింగ్స్ పాయింట్ల పట్టికలో ఏడో స్థానంలో నిలిచి.. కనీసం ప్లేఆఫ్‌కి కూడా అర్హత సాధించలేకపోయిన విషయం తెలిసిందే.