'అపరిచితుడు' కాన్సెప్ట్‌తో మరో పాన్ ఇండియా మూవీ

     Written by : smtv Desk | Wed, Apr 14, 2021, 02:46 PM

'అపరిచితుడు' కాన్సెప్ట్‌తో మరో పాన్ ఇండియా మూవీ

భారీ సినిమాలకు కేరాఫ్ అడ్రస్ అవుతూ పలు బిగ్గెస్ట్ హిట్స్ ఖాతాలో వేసుకున్న డైరెక్టర్ శంకర్.. మరో బిగ్గెస్ట్ అప్‌డేట్ ఇచ్చారు. గత కొన్ని నెలలుగా ఇండియన్ 2 సినిమాతో బిజీగా ఉన్న ఆయన మరో బిగ్ మూవీ అనౌన్స్ చేశారు. తన కెరీర్‌లో ఓ మైలురాయిగా నిలిచిపోయిన 'అపరిచితుడు' కాన్సెప్ట్‌తో బాలీవుడ్‌లో మరో సినిమా చేయబోతున్నట్లు అఫీషియల్‌గా ప్రకటించారు.

2005 సంవత్సరం విక్రమ్ హీరోగా తమిళంలో 'అన్నియన్'గా, తెలుగులో 'అపరిచితుడు'గా శంకర్ దర్శకత్వంలో వచ్చిన సినిమా బాక్సాఫీస్ హిట్‌గా రికార్డులు తిరగరాసింది. హిందీలో కూడా విడుదల చేసినప్పటికీ అంతగా వర్కౌట్ కాలేదు. దీంతో ఇప్పుడు 16 ఏళ్ళ అనంతరం మళ్ళీ దర్శకుడు శంకర్ అపరిచితుడు పాత్రతోనే కొత్త తరహా కథను రెడీ చేసి ప్రేక్షకుల ముందుకు తీసుకురాబోతున్నారు. పాన్ ఇండియా సినిమాగా ఈ మూవీ రూపొందనుంది.

ఈ భారీ సినిమాలో బాలీవుడ్ సూపర్ స్టార్ రణ్‌వీర్ సింగ్ హీరోగా నటించబోతున్నారు. పెన్ మూవీస్ బ్యానర్‌పై జయంతిలాల్ భారీ రేంజ్‌లో ఈ చిత్రాన్ని నిర్మించనున్నారు. 2022 మిడిల్‌లో ఈ సినిమా రెగ్యులర్ షూటింగ్ ప్రారంభమవుతుందని తెలిపారు శంకర్. 2023లో రిలీజ్ చేయచ్చని తెలిసింది. దీంతో ఈ భారీ సినిమాపై ఒక్కసారిగా అందరి దృష్టి పడింది.

మరోవైపు స్టార్ హీరో కమల్ హాసన్‌తో చేస్తున్న 'ఇండియన్2' సినిమాతో పాటు, మెగా పవర్ స్టార్ రామ్ చరణ్‌తో పాన్ ఇండియా మూవీ ప్రీ ప్రొడక్షన్ పనులతో బిజీగా ఉన్నారు శంకర్. ఈ రెండు ప్రాజెక్ట్స్ ఫినిష్ చేసి రణ్‌వీర్ సింగ్ సినిమాపై ఆయన ఫోకస్ పెట్టనున్నారట.





Untitled Document
Advertisements