తెలంగాణలో బీర్లకు ఫుల్ గిరాకీ...కొరత ఏర్పడే అవకాశం?!!

Written by : smtv Desk | Wed, Apr 14, 2021, 04:57 PM

వేసవి పెరుగుతున్న కొద్దీ తెలంగాణలో బీర్ల అమ్మకాలు కూడా ఎగబాకుతున్నాయి. దీన్ని బట్టి చూస్తే మద్యం ప్రియులు వేసవి తాపాన్ని తట్టుకొనేందుకు బీర్లు తాగేందుకు ఆసక్తి చూపుతున్నట్లుగా అర్థమవుతోంది. బీర్ల విక్రయాలు రాష్ట్రంలో రోజురోజుకు పెరిగిపోతుండడంతో తెలుగు రాష్ట్రాల్లో బీర్ల కొరత ఏర్పడే అవకాశం ఉన్నట్లుగా తెలుస్తోంది. ప్రస్తుతం తెలంగాణ మాత్రమే కాక ఏపీలో కూడా కనీసం 40 డిగ్రీలు తగ్గకుండా ఎండ కాస్తోంది. ముందు ముందు ఇది ఇంకా పెరిగే అవకాశం మెండుగా ఉంది. ఎండ తీవ్రతతో జనం ఉక్కిరిబిక్కిరి అవుతున్నారు.

వేసవి తీవ్రత అధికం కావడంతో మద్యం ప్రియులు చల్లదనం కోసం బీర్ తాగేందుకు ఇష్టపడుతున్నారు. ఇటు కరోనా వైరస్ ప్రభావం మద్యం విక్రయాలపై అస్సలు పడడం లేదు. ఈ జనవరిలో 27 లక్షలు, ఫిబ్రవరిలో 23 లక్షలు, మార్చిలో 24 లక్షల కేసులు కలిపి మొత్తంగా రూ.7 వేల కోట్లకు పైగా విలువైన మద్యం అమ్మకాలు జరిగాయి.

గత మూడు నెలల్లో లిక్కర్‌తో పోటీగా బీర్ల అమ్మకాలు సాగుతున్నాయి. జనవరిలో 33 లక్షల కేసులు అమ్ముడుపోగా, 28 లక్షలకు పైగా బీర్ కేసులు అమ్ముడైనట్లు తెలుస్తోంది. ఫిబ్రవరిలో 29 లక్షల కేసుల ఐఎంఎల్, 22 లక్షల కేసుల బీర్ల విక్రయాలు జరిగాయి. మార్చిలో 30 లక్షల కేసుల లిక్కర్ సేల్ కాగా, 29 లక్షల 59 వేల కేసుల బీర్లు అమ్ముడయ్యాయి. రాన్రాను బీర్లకు డిమాండ్ పెరుగుతుందని వైన్ షాపుల యాజమానులు చెబుతున్నారు.