ఢిల్లీ స్టార్ పేసర్ ఆన్రిచ్ నార్జ్‌కి కరోనా పాజిటివ్

Written by : smtv Desk | Thu, Apr 15, 2021, 04:04 PM

ఐపీఎల్ 2021 సీజన్‌లో కీలకమైన రాజస్థాన్ రాయల్స్‌ పోరు ముంగిట ఢిల్లీ క్యాపిటల్స్‌కి ఊహించని షాక్ తగిలింది. ఆ జట్టు అగ్రశ్రేణి ఫాస్ట్ బౌలర్ ఆన్రిచ్ నార్జ్ కరోనా వైరస్ బారినపడ్డాడు. ముంబయిలోని వాంఖడే స్టేడియం వేదికగా రాజస్థాన్ రాయల్స్‌తో గురువారం రాత్రి 7.30 గంటలకి ఢిల్లీ క్యాపిటల్స్ మ్యాచ్‌లో తలపడనుంది. చెన్నై సూపర్ కింగ్స్‌తో గత శనివారం జరిగిన మొదటి మ్యాచ్‌లో ఢిల్లీ క్యాపిటల్స్ 7 వికెట్ల తేడాతో అలవోక విజయాన్ని అందుకున్న విషయం తెలిసిందే.

ఐపీఎల్ 2021 సీజన్ కోసం దక్షిణాఫ్రికా చెందిన ఫాస్ట్ బౌలర్లు ఆన్రిచ్ నార్జ్, కగిసో రబాడ ఈ నెల 6న భారత్ గడ్డపై అడుగుపెట్టారు. ఢిల్లీ క్యాపిటల్స్ టీమ్‌కి ఆడబోతున్న ఈ ఇద్దరూ వారం రోజులు క్వారంటైన్‌ని పూర్తి చేసుకుని టీమ్‌ బయో- సెక్యూర్ బబుల్‌లోకి అడుగుపెట్టే ముంగిట.. నార్జ్‌కి కరోనా పాజిటివ్‌గా తేలింది. మరోవైపు అతనితో కలిసి జర్నీ చేసిన కగిసో రాబాడకి మాత్రం నెగటివ్ రావడంతో అతను టీమ్‌తో చేరిపోయాడు. దాంతో.. ఏదైనా తప్పిదంతో నార్జ్‌కి పాజిటివ్ వచ్చిందా..? అనే కోణంలో ఢిల్లీ క్యాపిటల్స్ అతని రిపోర్ట్స్‌ని పరిశీలిస్తోంది. ఈరోజు రాత్రి మ్యాచ్ ప్రారంభంకానుండగా.. నార్జ్ సెకండ్ ఆర్‌టీ- పీసీఆర్ టెస్టు రిజల్ట్ కోసం ఢిల్లీ క్యాపిటల్స్ ఎదురుచూస్తోంది.

భారత క్రికెట్ నియంత్రణ మండలి (బీసీసీఐ) నిబంధనల ప్రకారం.. క్రికెటర్‌కి కరోనా పాజిటివ్‌గా తేలితే..? అతడ్ని బబుల్‌కి దూరంగా కనీసం 10 రోజులు క్వారంటైన్‌లో ఉంచనున్నారు. దాంతో.. ఇప్పుడు నార్జ్‌ సెకండ్ ఆర్‌టీ- పీసీఆర్ టెస్టు రిజల్ట్ వచ్చే వరకూ క్వారంటైన్‌లోనే ఉండనున్నాడు. ఐపీఎల్ 2020 సీజన్‌లో రబాడ, నార్జ్ జోడీ.. ఢిల్లీ క్యాపిటల్స్‌కి బంతితో తిరుగులేని విజయాల్ని అందించిన విషయం తెలిసిందే.