టికెట్ ధరలపై మేం అడిగితేనే CM జగన్ అలా చేసారు...కాని...!!?

వకీల్ సాబ్ చిత్రానికి కలెక్షన్లు రాకుండా ఏపీ ప్రభుత్వం కుట్ర చేస్తుందని.. టికెట్ రేట్లు పెంపు విషయంలో ప్రభుత్వంపై వస్తున్న విమర్శల్ని తిప్పికొట్టారు ప్రముఖ నిర్మాత నట్టి కుమార్.

ఈ సందర్భంగా గురువారం నాడు ఎమర్జెన్సీ ప్రెస్ మీట్ నిర్వహించారు నట్టి కుమార్. ఆయన మాట్లాడుతూ.. ‘ఆంధ్రప్రదేశ్ ప్రభుత్వం ఏప్రిల్ 4న జీవో విడుదల చేశారు. ఈ జీవో పాస్ చేయాలని ప్రొడ్యుసర్స్ ఛాంబర్స్ తరుపున టీడీపీ ప్రభుత్వం ఉన్నప్పటి నుంచి అడుగుతున్నాం. టికెట్ రేట్లు విషయంలో జీవో పాస్ చేయండి అంటే టీడీపీ హయాంలో జీవో పాస్ కాలేదు. కానీ జగన్ మోహన్ రెడ్డిగారు మంచి మనస్సుతో ఈ జీవోని పాస్ చేశారు. అయితే ఈ జీవో అనుకోకుండా ఏప్రిల్ 8న పాస్ అయ్యింది. వకీల్ సాబ్ చిత్రం ఏప్రిల్ 9న విడుదల కావడంతో కావాలనే ఈ జీవోని పాస్ చేశారని ప్రచారం చేశారు. అది వాస్తవం కాదు.. ఎందుకంటే ఈ జీవో మేం అడిగిందే.. రాత్రికి రాత్రి అయ్యేది కాదు.

ఈ జీవో వచ్చినాసరే.. టికెట్ రేట్లు రూ.400, రూ.600 అంటూ అధిక ధరలకు అమ్మారు. దీంతో బెనిఫిట్ షోలు క్యాన్సిల్ అయ్యాయి. ఈ రేట్లుకి టికెట్లు అమ్మాడానికి వీళ్లేదని తూర్పు గోదావరి జిల్లా జాయింట్ కలెక్టర్ ఆర్డర్స్ ఇచ్చారు. దానికి వ్యతిరేకంగా కోర్టుకి వెళ్లారు.

ప్రభుత్వం ఇచ్చిన జీవో అందరి నిర్మాతలకు న్యాయం జరిగేలా కరెక్ట్‌గా ఉంది. రూ.250, రూ.100, రూ.60, రూ.40 ఉంది.. ఇంతకంటే రేట్లు ఎక్కువ ఏంటి? వీటిలో సవరణ చేయాల్సి ఉంది. బీ క్లాస్ సీ క్లాస్ రేటు మరీ తక్కువగా ఉంది.. కాస్త పెంచమంటే న్యాయం ఉంది.

కానీ వీటన్నింటికీ నిరసనగా రేపటి నుంచి ఆంధ్రప్రదేశ్‌లో థియేటర్స్ బంద్ చేయడం అనేది కరెక్ట్ కాదు. ఎవరికీ తెలియకుండా బుధవారం రాత్రి ఏపీ, తెలంగాణ ఎగ్జిబిటర్స్ మీటింగ్ పెట్టుకుని.. సురేష్ బాబు గారి ఆధ్వర్యంలో థియేటర్స్ అన్నీ బంద్ అని అంటున్నారు. అయితే వకీల్ సాబ్ మాత్రం ఆడుతుంది అట.

మీకు నిజంగా బంద్ చేయాలని ఉంటే.. వకీల్ సాబ్ థియేటర్స్ కూడా బంద్ చేయండి. ఆ ఒక్క సినిమాకి మినహాయింపు ఎందుకు? చిన్న సినిమాలు 12 రిలీజ్ అవుతున్నాయి. వాటిని ఎందుకు అడ్డుకుంటున్నారు. జీవోకి వ్యతిరేకంగా బంద్ అంటే మొత్తం అంతా చేయాలి కదా.


అసలు బంద్ చేసే వాళ్లకి ఈ సినిమా యాక్ట్ 1973 మీకు తెలుసా? ఆ యాక్ట్ ఏమి ఉంది.. థియేటర్స్ బంద్ చేస్తే లైసెన్స్ క్యాన్సిల్ చేయొచ్చు.. ఎవరైతే బంద్ చేస్తున్నారో ఆ థియేటర్స్ లైసెన్స్ రద్దు చేసి పాత బకాయిల్ని క్లియర్ చేసేట్టు ప్రభుత్వం చర్యలు చేపట్టాలని కోరతా. సినిమా ఇండస్ట్రీ ఎప్పుడు గవర్నమెంట్‌కి వ్యతిరేకంగా వెళ్లలేదు.

నిన్న ఎగ్జిబిటర్స్ అందరూ మీటింగ్ పెట్టుకుని ఆంధ్రావాళ్లం బంద్ చేస్తున్నాం.. తెలంగాణ వాళ్లు కూడా సపోర్ట్ చేస్తే గవర్నమెంట్ దిగి వస్తుందని అన్నారు. కానీ తెలంగాణా వాళ్లు ఈ వివాదంలోకి మమ్మల్ని లాగొద్దన్నారు. బంద్‌కి సహకరించలేం అని చెప్పినందుకు ధన్యవాదాలు. ఈస్ట్ వెస్ట్‌లలో బ్లాక్ మార్కెట్‌లా తయారైంది థియేటర్స్ పరిస్థితి.

ఇప్పుడు ఎవరైతే గవర్నమెంట్‌ జీవోకి వ్యతిరేకంగా బంద్ చేసి థియేటర్స్ క్లోజ్ చేస్తున్నారో వాళ్ల లైసెన్స్‌లు రద్దు చేయాలని నేను కోర్టుకి వెళ్తా. థియేటర్స్ బంద్ చేస్తున్న నేపథ్యంలో జాయింట్ కలెక్టర్లకు వారం ముందు సమాచారం ఇవ్వాలి.. కారణం చెప్పాలి.. అప్పుడు థియేటర్లు మూయాలి. పేద ప్రజలకు అనుకూలంగా జీవో ఉంటే వీళ్లకి నొప్పి ఏంటి??

వకీల్ సాబ్ థియేటర్స్ మాత్రమే ఉంచి.. మిగతా థియేటర్స్‌ని బంద్ చేయడం ఏంటి?? సురేష్ బాబు, అరవింద్ గారికి సంబంధించిన అన్ని థియేటర్స్ రేపటి నుంచి బంద్ చేస్తున్నాయి ఏపీలో.

నా సినిమా దెయ్యం రేపు రిలీజ్ ఉంది.. నా సినిమా ఈస్ట్ వెస్ట్‌లలో ఆగిపోతే పరిస్థితి ఏంటి?? అందుకే నేను లీగల్‌గా ముందుకు వెళ్తా.. రాత్రికి రాత్రి థియేటర్స్ బంద్ చేస్తాం అంటే కుదరదు. బంద్ చేస్తున్న థియేటర్స్ లైసెన్స్‌ను శాశ్వతంగా క్యాన్సిల్ అయ్యే పోరాటం చేస్తానని హెచ్చరించారు నిర్మాత నట్టికుమార్.