హిందీ ‘అపరిచితుడు’కి అప్పుడే బ్రేక్...నిర్మాత వార్నింగ్

భారీ బడ్జెట్‌తో, మంచి సందేశంతో గ్రాండ్‌గా సినిమాలను తెరకెక్కిండంలో స్టార్ డైరెక్టర్ శంకర్ ముందు వరుసలో ఉంటారు. శంకర్ తెరకెక్కించిన సినిమాను అన్ని సూపర్ హిట్‌లే. ఇక శంకర్ డైరెక్షన్‌లో విలక్షణ నటుడు విక్రమ్ హీరోగా తెరకెక్కిన బ్లాక్‌బస్టర్ హిట్ సినిమా ‘అపరిచితుడు’(తమిళంలో అన్నియన్). రామం, రెమో, అపరిచితుడు మూడు పాత్రల్లో విక్రమ్ ఈ సినిమాలో అదరగొట్టాడు. ఈ సినిమా తర్వాత విక్రమ్‌కు దేశ వ్యాప్తంగా గుర్తింపు వచ్చింది. అయితే దాదాపు 15 సంవత్సరాల తర్వాత ఈ సినిమాని హిందీలో రీమేక్ చేసేందుకు సన్నాహాలు ప్రారంభించారు. బాలీవుడ్‌లో రణ్‌వీర్ సింగ్ హీరోగా ఈ సినిమాను రూపొందిస్తున్నట్లు దర్శకుడు శంకర్ బుధవారం ప్రకటించారు.

అయితే ఇలా ప్రకటన వచ్చిందో.. లేదో.. హిందీ ‘అపరిచితుడు’కి అప్పుడే బ్రేక్ పడింది. అన్నియన్ పూర్తి హక్కులు తన వద్ద ఉన్న కారణంగా తన అనుమతి లేకుండా సినిమాను రీమేక్ చేయాలని ప్రయత్నించడం నేరమని ఆస్కార్ ఫిలిమ్స్ అధినేత, అన్నియన్ నిర్మాత వి. రవిచంద్రన్ హెచ్చరించారు. ఈ మేరకు ఆయన దర్శకుడు శంకర్‌కు ఓ లేఖ కూడా రాశారు. అన్నియన్ కథ హక్కులు పూర్తిగా తనవని.. రచయితకు పూర్తిగా పేమెంట్ చేసి ఆ హక్కులను తాను తీసుకున్నానని రవిచంద్రన్ ఆయన దర్శకుడు శంకర్‌కు రాసిన లేఖలో పేర్కొన్నారు.

అంతేకాక.. ‘బాయ్స్’ సినిమాతో ఫ్లాప్‌ అందుకున్న శంకర్‌ను.. అదేమీ పట్టించుకోకుండా.. అన్నియన్‌కు దర్శకుడిగా పెట్టుకొని మళ్లీ అతనికి లైఫ్ ఇచ్చానని ఆయన గుర్తు చేశారు. దీనిపై ఏ మాత్రం కృతజ్ఞత చూపకుండా శంకర్ ఇప్పుడు ఇలాంటి నిర్ణయం తీసుకోవడం చాలా బాధకరమని ఆయన పేర్కొన్నారు. తను చేసిన మంచిని ఏ మాత్రం గుర్తుంచుకోకుండా.. కనీస నైతిక విలువలు లేకుండా శంకర్ ఇప్పుడు ఆ సినిమాను హిందీలో రీమేక్ చేస్తున్నానని ప్రకటించడం తప్పని ఆయన అన్నారు.తన తప్పుని తెలుసుకొని వెంటనే సినిమా తదుపరి కార్యక్రమాలను నిలిపివేయాలని.. లేకుంటే చట్టరీత్యా చర్యలు తీసుకుంటామని ఆయన హెచ్చరించారు. ప్రస్తుతం భారతీయుడు-2 సినిమా షూటింగ్‌లో బిజీగా ఉన్న శంకర్.. అన్నియన్ హిందీ రీమేక్‌ను వచ్చే ఏడాది జూన్ నుంచి ప్రారంభించాలని ప్లాన్ చేశారు. ఈ నేపథ్యంలో ఆ సినిమా నిర్మాత నుంచి లేఖ రావడం అభిమానులను కలవరపాటుకు గురి చేస్తోంది. దీని తర్వాత తాను శంకర్‌కు లీగల్ నోటీసులు కూడా జారీ చేస్తానని అన్నారు. మరి దీనిపై శంకర్ ఏ విధంగా స్పందిస్తారో వేచి చూడాలి.