ఐపీఎల్ 2021 సీజన్లోకి భారీ అంచనాల నడుమ అడుగుపెట్టిన క్రిస్ మోరీస్.. రెండో మ్యాచ్లోనే సత్తాచాటాడు. ఢిల్లీ క్యాపిటల్స్తో ముంబయిలోని వాంఖడే స్టేడియం వేదికగా గురువారం రాత్రి జరిగిన మ్యాచ్లో నాలుగు సిక్సర్లు బాదిన క్రిస్ మోరీస్ (36 నాటౌట్: 18 బంతుల్లో 4x6).. రాజస్థాన్ టీమ్కి చివర్లో ఊహించని విజయాన్ని అందించాడు. క్రిస్ మోరీస్ ఒకవైపు సిక్సర్లు కొడుతుంటే మరోవైపు డగౌట్ కూర్చుని ఉన్న రాజస్థాన్ కెప్టెన్ సంజు శాంసన్ పశ్చాతాపంలో కనిపించాడు. దానికి కారణం.. పంజాబ్తో ఇటీవల ముగిసిన ఫస్ట్ మ్యాచ్లో క్రిస్ మోరీస్కి స్ట్రైకింగ్ ఇచ్చేందుకు చివర్లో సంజు శాంసన్ నిరాకరించడమే.
రాజస్థాన్ విజయానికి గురువారం రాత్రి 12 బంతుల్లో 27 పరుగులు అవసరమవగా.. రబాడ వేసిన ఇన్నింగ్స్ 19వ ఓవర్లో రెండు సిక్సర్లు బాదిన క్రిస్ మోరీస్.. చివరి ఓవర్లో టామ్ కరన్ బౌలింగ్లోనూ రెండు సిక్సర్లు బాదేసి మరో రెండు బంతులు మిగిలి ఉండగానే టీమ్ని గెలిపించాడు. మోరీస్ కొట్టిన నాలుగు సిక్సర్లూ ఏదో బౌండరీ లైన్కి వెలుపలగా పడలేదు. అన్నీ బాగా ఎత్తులో వెళ్లి స్టాండ్స్లో పడ్డాయి. ఐపీఎల్ 2021 సీజన్ మినీ వేలంలో రూ.16.25 కోట్లకి మోరీస్ని రాజస్థాన్ కొనుగోలు చేసిన విషయం తెలిసిందే.
కింగ్స్ పంజాబ్తో గత సోమవారం జరిగిన మ్యాచ్లో రాజస్థాన్ విజయానికి చివరి రెండు బంతుల్లో 5 పరుగులు అవసరమగా.. అర్షదీప్ బౌలింగ్లో డీప్ ఎక్స్ట్రా కవర్ దిశగా బంతిని హిట్ చేసిన సంజు శాంసన్ కనీసం సింగిల్ తీసేందుకు నిరాకరించాడు. నాన్స్ట్రైక్ ఎండ్లోని మోరీస్.. దాదాపు కీపర్ ఎండ్వైపు వెళ్లిపోయాడు. కానీ.. సంజు శాంసన్ మాత్రం మోరీస్ని వెనక్కి పంపాడు. ఆ తర్వాత ఆఖరి బంతికి సిక్స్ కొట్టే ప్రయత్నంలో సంజు శాంసన్ ఔటవగా.. రాజస్థాన్ 4 పరుగుల తేడాతో పరాజయం పాలైంది. శాంసన్ ఆ సింగిల్కి నిరాకరించడంతో క్రిస్ మోరీస్ తీవ్ర అసహనం వ్యక్తం చేశాడు. దానిపై తీవ్ర స్థాయిలో చర్చ కూడా జరిగింది.
సంజు శాంసన్ అలా సింగిల్కి నిరాకరించడంపై క్రిస్ మోరీస్ మళ్లీ స్పందించాడు. ‘‘నేను పరుగెత్తి మళ్లీ వెనక్కి రాగలను. అప్పటికి సంజు శాంసన్ బంతిని చక్కగా హిట్ చేస్తూ కనిపించాడు. కానీ.. కొంత మంది నా వేగంపై తక్కువ అంచనా వేశారు. ఒకవేళ సంజు శాంసన్ చివరి బంతికి సిక్స్ కొట్టి ఉంటే..? నేను ఫీలయ్యేవాడ్ని కాదు’’ అని మోరీస్ వెల్లడించాడు.
Turn of events in a matter of day for Chris Morris! #chrismorris #RRvDC pic.twitter.com/wquR09INOC
mdash; Anis Sajan (@mrcricketuae) April 15, 2021