అడ్రస్ ప్రూఫ్ లేకున్నా గ్యాస్ సిలిండర్ పొందొచ్చు

Written by : smtv Desk | Fri, Apr 16, 2021, 01:47 PM

గ్యాస్ సిలిండర్ కనెక్షన్ తీసుకోవాలంటే కచ్చితంగా ఉండాల్సిన డాక్యుమెంట్ అడ్రస్ ప్రూఫ్. అడ్రస్ ప్రూఫ్ లేకపోతే గ్యాస్ కనెక్షన్ తీసుకోవడం వీలు కాదు. ఎల్‌పీజీ గ్యాస్ కనెక్షన్ లేకపోతే సిలిండర్ బుక్ చేసుకోవడం సాధ్యపడదు. అయితే ఇకపై అడ్రస్ ప్రూఫ్ లేకపోయినా కూడా సిలిండర్ పొందొచ్చు.

ఇండియన్ ఆయిల్ కార్పొరేషన్ మాత్రం అడ్రస్ ప్రూఫ్ లేకుండానే గ్యాస్ సిలిండర్ అందిస్తోంది. అడ్రస్ ప్రూఫ్ కచ్చితంగా ఉండాలనే నిబంధనలను ఐఓసీ తొలగించింది. అయితే ఇది 5 కేజీల సిలిండర్‌కు మాత్రమే వర్తిస్తుంది. మీరు సిలిండర్ పొందాలని భావిస్తే.. ఏదో ఒక ఐడెంటిటీ ప్రూఫ్ చూపిస్తే సరిపోతుంది.

ఇకపోతే కేంద్ర ప్రభుత్వం ఇప్పటికే పేదలకు కోటి ఉచిత ఎల్‌పీజీ కనెక్షన్లు అందిస్తామని ప్రకటించింది. మీరు ఉజ్వల స్కీమ్ వెబ్‌సైట్‌కు వెళ్లి ఉచిత కనెక్షన్ కోసం అప్లై చేసుకోవచ్చు. ఈ సైట్ నుంచి ఫామ్ డౌన్ లోడ్ చేసుకొని.. మీ దగ్గరిలోని గ్యాస్ ఏజెన్సీ వద్దకు వెళ్లి సమర్పిస్తే మీకు కనెక్షన్ లభిస్తుంది. ఆధార్, జన్ ధన్ ఖాతా వంటి కేవైసీ డాక్యుమెంట్లు కూడా అందించాలి.

కేంద్ర ప్రభుత్వం ఉజ్వల స్కీమ్ కింద ఒక్కో గ్యాస్ కనెక్షన్‌కు రూ.1,600 సబ్సిడీ అందిస్తుంది. అదేసమయంలో ఆయిల్ మార్కెటింగ్ కంపెనీలు కూడా రూ.1,600 చెల్లిస్తారు. దీంతో ప్రజలకు ఉచితంగానే గ్యాస్ కనెక్షన్ వస్తుంది. అయితే ఆయిల్ మార్కెటింగ్ కంపెనీలు చెల్లించిన రూ.1,600ను మళ్లీ విడతల వారీగా చెల్లించాలి. కంపెనీలు గ్యాస్ సబ్సిడీ డబ్బుల్లో ఈ డబ్బులను కట్ చేసుంటాయి.