కేంద్రం కరోనా కట్టడి....‘‘తుగ్లక్ లాక్‌డౌన్, గంటలు మోగించడం, దేవుడ్ని ప్రార్థించడం’’

కరోనా కట్టడి విషయంలో కేంద్రంలోని నరేంద్ర మోదీ సర్కారు విఫలమైందని కాంగ్రెస్ నేత రాహుల్ గాంధీ విమర్శలు గుప్పించారు. ‘‘తుగ్లక్ లాక్‌డౌన్, గంటలు మోగించడం, దేవుడ్ని ప్రార్థించడం’’ వంటి వ్యూహాలను కరోనా పోరాటానికి అనుసరిస్తోందని రాహుల్ ఎద్దేవా చేశారు. దేశంలో తొలిసారిగా 24 గంటల్లో 2.17 లక్షల కేసులు బయటపడిన వేళ రాహుల్ ఈ వ్యాఖ్యలు చేయడం గమనార్హం. గతేడాది కరోనా వైరస్ వ్యాప్తి మొదలైన తర్వాత ఇంత పెద్ద సంఖ్యలో పాజిటివ్ కేసులు నమోదుకావడం ఇదే తొలిసారి.
‘‘కేంద్ర ప్రభుత్వ కోవిడ్ వ్యూహం.. స్టేజ్-1 తుగ్లక్ లాక్‌డౌన్ విధించడం.. స్టేజ్-2 గంటలు మోగించడం.. స్టేజ్-3 దేవుడ్ని ప్రార్ధించడం’’ అంటూ రాహుల్ ట్వీట్ చేశారు. కరోనా వైరస్ వ్యాప్తి నియంత్రణ విషయంలో కేంద్ర ప్రభుత్వ వైఖరిపై రాహుల్ తీవ్రంగా విరుచుకుపడుతున్నారు. వివిధ దేశాల్లో ఆమోదం పొందిన టీకాలకు అనుమతులు ఇచ్చే ప్రక్రియను వేగవంతం చేయాలని కేంద్ర ప్రభుత్వం ఈ వారంలో తీసుకున్న నిర్ణయంపై కూడా రాహుల్ విమర్శలు గుప్పించారు. కొద్దిరోజుల కిందటే రాహుల్ గాంధీ ఈ విషయంపై కేంద్రానికి లేఖ రాశారు. ఈ క్రమంలో కేంద్రం నిర్ణయం వెలువడటంపై ఆయన స్పందించారు. ‘మొదట వారు మిమ్మల్ని విస్మరిస్తారు. తరవాత నవ్వుతారు. మీతో పోరాడతారు. చివరికి మీరే గెలుస్తారు’ అంటూ కేంద్రంపై వ్యంగ్యాస్త్రాలు సంధించారు. రష్యా అభివృద్ధి చేసిన స్పుత్నిక్- వీ టీకాను భారత్ అత్యవసర వినియోగానికి ఆమోదించిన వార్తను షేర్ చేస్తూ రాహుల్ ఈ విమర్శలు చేశారు. నిబంధనలకు అనుగుణంగా ఇతర టీకాల అత్యవసర వినియోగానికి అనుమతులు మంజూరు చేసే ప్రక్రియను వేగవంతం చేయాలని రాహుల్ తన లేఖలో సూచించారు. దీనిపై అధికార బీజేపీ నేతలు విమర్శలు చేశారు. కేంద్రం ఇటీవల తీసుకున్న నిర్ణయంతో విదేశాల్లో ఇప్పటికే వినియోగిస్తోన్న మోడెర్నా, జాన్సన్‌ అండ్ జాన్సన్‌, ఫైజర్ టీకాలకు మార్గం సుగమం కానుంది. ఇక, మోదీ సర్కారు పాలనను రాహుల్ సహా కాంగ్రెస్ నేతలు ఢిల్లీ సుల్తాన్‌ తుగ్లక్ పాలనతో పోల్చుతూ విమర్శలు గుప్పిస్తున్నారు. కరోనా వైరస్‌పై ముందుండి పోరాటం చేస్తున్న వైద్య ఆరోగ్య సిబ్బందికి సంఘీభావంగా చప్పట్లు, దీపాలు వెలగించడం, గంటల మోగించడం వంటి కేంద్రం చేపట్టిన కార్యక్రమాలపై కాంగ్రెస్ విమర్శనాస్త్రాలు సంధించింది.

mdash; Rahul Gandhi (@RahulGandhi) April 16, 2021