ఐపీఎల్ 2021 పాయింట్ల పట్టికలో చిట్టచివరలో CSK

Written by : smtv Desk | Fri, Apr 16, 2021, 05:46 PM

ఐపీఎల్ 2021 సీజన్‌లో గెలుపు బోణి కొట్టిన రాజస్థాన్ రాయల్స్.. పాయింట్ల పట్టికలో ఆరో స్థానం నుంచి ఐదుకి ఎగబాకింది. ఢిల్లీ క్యాపిటల్స్‌తో ముంబయిలోని వాంఖడే స్టేడియం వేదికగా గురువారం రాత్రి జరిగిన మ్యాచ్‌లో 3 వికెట్ల తేడాతో విజయాన్ని అందుకున్న రాజస్థాన్.. నెట్‌ రన్‌రేట్‌ని కూడా +0.052తో మెరుగు పర్చుకోగలిగింది. మరోవైపు రాజస్థాన్‌తో మ్యాచ్ ముందు వరకూ రెండో స్థానంలో ఉన్న ఢిల్లీ ఒక్కసారిగా నాలుగో స్థానానికి పడిపోయింది. నెట్‌ రన్‌రేట్ కూడా +0.779 నుంచి +0.195కి పడిపోయింది.

పాయింట్ల పట్టికలో రాయల్ ఛాలెంజర్స్ బెంగళూరు నాలుగు పాయింట్లతో నెం.1 స్థానంలో కొనసాగుతుండగా.. ఆ తర్వాత వరుసగా ముంబయి ఇండియన్స్, పంజాబ్ కింగ్స్, ఢిల్లీ క్యాపిటల్స్ టాప్-4లో కొనసాగుతున్నాయి. ఐపీఎల్ 2021 సీజన్ లీగ్ దశలో మొత్తం 56 మ్యాచ్‌లు జరగనుండగా.. లీగ్ దశ ముగిసే సమయానికి టాప్-4లో నిలిచిన జట్లు ప్లేఆఫ్‌కి అర్హత సాధించనున్నాయి. ఇక రాజస్థాన్ రాయల్స్, కోల్‌కతా నైట్‌రైడర్స్ ఐదు, ఆరు స్థానాల్లో కొనసాగుతుండగా.. సన్‌రైజర్స్ హైదరాబాద్, చెన్నై సూపర్ కింగ్స్ చిట్టచివరి స్థానాలకే పరిమితమయ్యాయి.

పంజాబ్ కింగ్స్, చెన్నై సూపర్ కింగ్స్ ఈరోజు ముంబయిలోని వాంఖడే స్టేడియం వేదికగానే రాత్రి 7.30 గంటలకి తలపడబోతున్నాయి. ఈ మ్యాచ్‌లో పంజాబ్ గెలిస్తే నెం.1 స్థానానికి ఎగబాకే అవకాశం ఉంది. ఒకవేళ చెన్నై గెలిస్తే.. ఆ జట్టు ఏడో స్థానానికి మాత్రమే ఎగబాకనుంది. దానికి కారణం.. నెట్ రన్‌‌రేట్ -0.779గా ఉండటమే.