కాజల్‌పై డైరెక్టర్ ప్రశంసల వర్షం...నెటిజన్ల కౌంటర్స్

     Written by : smtv Desk | Fri, Apr 16, 2021, 06:39 PM

కాజల్‌పై డైరెక్టర్ ప్రశంసల వర్షం...నెటిజన్ల కౌంటర్స్

పంచదార బొమ్మ కాజల్ అగర్వాల్ సినిమా కెరీర్ పెళ్లి తర్వాత కాస్త స్లో అయింది. టాలీవుడ్‌లో అడుగుపెట్టిన కొంతకాలానికే స్టార్ హీరోయిన్ స్టేటస్ సాధించిన ఈ భామ.. దాదాపు అందరూ స్టార్ హీరోలతో నటించి ఒకప్పుడు నెం.1 హీరోయిన్‌గా వెలుగొందింది. అయితే గత కొంతకాలం అవకాశాలు కరువయ్యో.. లేక మరేదైనా కారణంగానో.. కాజల్ సినిమాలు ఎక్కువగా రావడం లేదు.


ఇక పెళ్లి తర్వాత గ్లామరస్ పాత్రల జోలికి వెళ్లకండా.. కేవలం లేడీ ఓరియంటెడ్ స్క్రిప్ట్‌లనే కాజల్ సెలక్ట్ చేసుకుంటున్నట్లు కనిపించింది. తాజాగా ‘లైవ్ టెలికాస్ట్’ అనే హారర్ వెబ్‌సిరీస్‌లో కూడా నటించింది కాజల్. ఈ వెబ్‌సిరీస్ ప్రేక్షకులను విశేషంగా ఆకట్టుకుంది. ప్రస్తుతం మెగాస్టార్ చిరంజీవి హీరోగా నటిస్తున్న ‘ఆచార్య’ సినిమాలో హీరోయిన్‌గా నటిస్తుంది ఈ బ్యూటీ.

దీంతో పాటు తమిళంలో ‘గోష్టి’ అనే సినిమాలో నటిస్తోంది కాజల్. పొలిటికల్ డ్రామాగా తెరకెక్కుతున్న ఈ సినిమాలో ఆమె తమిళనాడు దివంగత ముఖ్యమంత్రి జయలలిత పాత్ర చేస్తుందని ఫస్ట్‌లుక్ చూస్తే అర్థమవుతోంది. అయితే ఈ సినిమా బ్యాక్‌డ్రాప్ ఏంటి అనే విషయంలో ఇంకా క్లారిటీ లేదు. కానీ ప్రధాన పాత్రలో నటిస్తున్న కాజల్‌కు మాత్రం ఈ సినిమా ద్వారా మంచి గుర్తింపు వచ్చే అవకాశం ఉందని టాక్ వినిపిస్తుంది.

అయితే ఈ సినిమా దర్శకుడు ఎస్ కళ్యాణ్ ఈ మధ్య ఓ మీడియా సమావేశంలో మాట్లాడుతూ.. కాజల్‌పై ప్రశంసల వర్షం కురిపించాడు. కథ చెప్పిన వెంటనే కాజల్ ఓకే చెప్పింది.. అని అన్న ఆయన సినిమా కేవలం మూడు నెలల్లోనే పూర్తి కావడానికి ప్రధాన కారణం కాజల్ మేడమే అంటూ చెప్పుకొచ్చాడు. సినిమా షూటింగ్ ఆరంభం నుంచి లాస్ట్ షాట్ వరకూ కాజల్ పూర్తి ఎనర్జీతో షూటింగ్ చేసిందటూ ఆమెని పొగడ్తలతో ముంచెత్తాడు.

దీనిపై నెటిజన్లు విభిన్నంగా స్పందిస్తున్నారు. ‘ఏ సినిమా షూటింగ్‌లో అయినా ఏ హీరోయిన్ అయినా ఎనర్జీగానే నటిస్తుంది.. ఈ మాత్రం దానికి అంత పొగడాల్సిన అవసరం లేదు’.. ‘ఈ పొగడ్తల పని పక్కన పెట్టి ముందు సినిమా విడుదల చేస్తే బాగుంటుంది’ అంటూ నెటిజన్లు సెటైర్లు వేస్తున్నారు.





Untitled Document
Advertisements