"భారతదేశంలో త్వరలో 8 కొత్త బ్యాంకులు"

     Written by : smtv Desk | Fri, Apr 16, 2021, 07:19 PM


దేశీ కేంద్ర బ్యాంక్ రిజర్వు బ్యాంక్ ఆఫ్ ఇండియా RBI కీలక విషయాన్ని వెల్లడించింది. కొత్త బ్యాంకుల ఏర్పాటు కోసం తమ వద్దకు 8 అప్లికేషన్స్ వచ్చాయని తెలిపింది. యూనివర్సల్ ప్రైవేట్ బ్యాంక్, స్మాల్ ఫైనాన్స్ బ్యాంకుల ఏర్పాటు కోసం అవసరమైన లైసెన్స్ పొందడం కోసం ఈ దరఖాస్తులు వచ్చాయని వివరించింది.

యూనివర్సల్ బ్యాంక్ లైసెన్స్ కోసం నాలుగు సంస్థలు అప్లై చేసుకున్నాయి. వీటిల్లో యూఏఈ ఎక్స్చేంజ్ అండ్ ఫైనాన్షియల్ సర్వీసెస్, రెప్కో బ్యాంక్, చైతన్య ఇండియా ఫిన్ క్రెడిట్, పంకజ్ వైశ్ అండ్ అదర్స్ అనే సంస్థలు ఉన్నాయి. వీటిల్లో చైతన్య ఇండియా ఫిన్ క్రెడిట్ సంస్థకు ఫ్లిప్‌కార్ట్ సహ వ్యవస్థాపకుడు సచిన్ బన్సాల్ సారథ్యం వహిస్తున్నారు.

అలాగే మరో 4 బ్యాంకులు స్మాల్ ఫైనాన్స్ బ్యాంక్ లైసెన్స్ కోసం దరఖాస్తు చేసుకున్నాయి. వీటిల్లో వీసాఫ్ట్ టెక్నాలజీస్, కాలికట్ సిటీ సర్వీస్ కోఆపరేటివ్ బ్యాంక్, అఖిల్ కుమార్ గుప్తా, ద్వారా క్షేత్రియ గ్రామీణ్ ఫైనాన్షియల్ సర్వీసెస్ అనే సంస్థలు ఉన్నాయి. ఆర్‌బీఐ 2016లో విడుదల చేసిన మార్గదర్శకాల ప్రకారం అర్హత కలిగిన సంస్థలు బ్యాంక్ లైసెన్స్ పొందొచ్చు.

యూనివర్సల్ బ్యాంక్ లైసెన్స్ పొందాలని భావించే వ్యక్తులు కనీసం పదేళ్లు బ్యాంకింగ్ అండ్ ఫైనాన్స్ రంగంలో సీనియర్ లెవెల్ బాధ్యతలు నిర్వహించి ఉండాలి. అదే ప్రైవేట్ కంపెనీలు, సంస్థలు అయితే పదేళ్ల ట్రాక్స్ రికార్డ్‌తోపాటు రూ.5 వేల కోట్లకు పైగా అసెట్స్ కలిగి ఉండాలి. స్మాల్ ఫైనాన్స్ బ్యాంక్ లైసెన్స్‌ కోసం అప్లై చేసుకునే వారికి కూడా దాదాపు ఇదే నిబంధనలు వర్తిస్తాయి.





Untitled Document
Advertisements