"KKR ఓటమికి కెప్టెన్సీనే కారణం"...గంభీర్

     Written by : smtv Desk | Mon, Apr 19, 2021, 01:57 PM


ఐపీఎల్ 2021 సీజన్‌లో రాయల్ ఛాలెంజర్స్ బెంగళూరు చేతిలో ఆదివారం కోల్‌కతా నైట్‌రైడర్స్ ఓడిపోవడానికి చెత్త కెప్టెన్సీనే కారణమని భారత మాజీ ఓపెనర్ గౌతమ్ గంభీర్ దుయ్యబట్టాడు. చెన్నైలోని చెపాక్ స్టేడియం వేదికగా జరిగిన ఈ మ్యాచ్‌లో మొదట బ్యాటింగ్ చేసిన బెంగళూరు టీమ్.. ఏబీ డివిలియర్స్ (76 నాటౌట్: 34 బంతుల్లో 9x4, 3x6), గ్లెన్ మాక్స్‌వెల్ (78: 49 బంతుల్లో 9x4, 3x6) చెలరేగడంతో 4 వికెట్ల నష్టానికి 204 పరుగులు చేసింది. అనంతరం ఛేదనలో తడబడిన కోల్‌కతా టీమ్ 166/8కే పరిమితమైంది. స్పిన్‌కి ఆరంభంలో పిచ్‌ అనుకూలించినట్లు కనిపించినా.. కోల్‌కతా కెప్టెన్ అనాలోచిత నిర్ణయాలతో జట్టు ఓటమికి కారణమయ్యాడని గౌతమ్ గంభీర్ విమర్శించాడు.

మ్యాచ్‌లో ఇన్నింగ్స్ 2వ ఓవర్ వేసిన మిస్టరీ స్పిన్నర్ వరుణ్ చక్రవర్తి.. రెండో బంతికి ఆర్సీబీ కెప్టెన్ విరాట్ కోహ్లీ (5: 6 బంతుల్లో 1x4)ని ఆఖరి బంతికి రజత్ పాటిదార్ (1: 2 బంతుల్లో)ని ఔట్ చేసేశాడు. వరుణ్ చక్రవర్తిని ఎదుర్కోవడంలో ఆ ఓవర్‌లో బెంగళూరు బ్యాట్స్‌మెన్‌లు ఇబ్బందిపడ్డారు. మొత్తంగా ఆ ఓవర్‌లో మూడు పరుగులిచ్చిన వరుణ్ చక్రవర్తి రెండు వికెట్లు పడగొట్టాడు. కానీ.. ఆ తర్వాత అతనితో 8వ ఓవర్ వరకూ కెప్టెన్ ఇయాన్ మోర్గాన్ బౌలింగ్ చేయించలేదు. ఒకవేళ నాలుగో ఓవర్‌ని వరుణ్ చక్రవర్తి వేసి ఉంటే..? అతను మాక్స్‌వెల్ వికెట్ పడగొట్టేవాడని గౌతమ్ గంభీర్ అంచనా వేశాడు. భారత్‌కి చెందిన ఏ కెప్టెన్ కూడా ఇలా చెత్త నిర్ణయం తీసుకోడని గంభీర్ చెప్పుకొచ్చాడు.

‘‘విరాట్ కోహ్లీ చాలా పెద్ద వికెట్. ఇందులో సందేహమే లేదు. కానీ.. ఒక బౌలర్ ఒకే ఓవర్‌లో రెండు వికెట్లు తీసిన తర్వాత.. అతడ్ని ఎవరైనా పక్కన పెడతారా..? ఇలాంటి చెత్త కెప్టెన్సీని నా జీవితంలో చూడలేదు. నిజమే ఫామ్‌లో ఉన్న బ్యాట్స్‌మెన్ క్రీజులో ఉన్నాడు. కానీ.. వరుణ్ చక్రవర్తి తన స్పెల్‌ని కంటిన్యూ చేసి ఆరు ఓవర్లలోపే మాక్స్‌వెల్ వికెట్ తీసింటే..? మ్యాచ్ పని అయిపోయేది. ఏబీ డివిలియర్స్ ఉన్నా.. ఒకవేళ మాక్స్‌వెల్ ఆరంభంలోనే ఔటై ఉంటే..? అప్పుడు ఏబీపై ఒత్తిడి పడేది. భారత్‌కి చెందిన ఏ కెప్టెన్ కూడా ఇంత చెత్త నిర్ణయం తీసుకోడు’’ అని గంభీర్ వెల్లడించాడు. కోల్‌కతా నైట్‌రైడర్స్‌కి కెప్టెన్‌గా రెండు టైటిల్స్‌ని గంభీర్ అందించిన విషయం తెలిసిందే. ఇయాన్ మోర్గాన్ కెప్టెన్సీలోనే 2019 వన్డే ప్రపంచకప్‌ని ఇంగ్లాండ్ గెలిచింది.





Untitled Document
Advertisements