వెండితెరపై విలేజ్ అమ్మాయిగా...

Written by : smtv Desk | Mon, Apr 19, 2021, 02:00 PM

కన్నుగీటి కుర్రకారును బుట్టలో వేసుకున్న ప్రియా ప్రకాష్ వారియర్ ఇటీవలే తన తొలి తెలుగు సినిమా `చెక్‌`తో ప్రేక్షకుల ముందుకొచ్చిన సంగతి తెలిసిందే. నితిన్ హీరోగా చంద్రశేఖర్ యేలేటి దర్శకత్వంలో వచ్చిన ఈ సినిమా ఆశించిన మేర ఆకట్టుకోకపోయినప్పటికీ వరుస ఆఫర్స్ మాత్రం తలుపుతడుతున్నాయి. ప్రస్తుతం ఈ అమ్మడు తెలుగులో మరో సినిమాతో రెడీ అయింది. తేజ స‌జ్జా హీరోగా రూపొందిన ఈ సినిమాను ‘ఇష్క్’ పేరుతో ప్రేక్షకుల ముందుకు తీసుకురాబోతున్నారు. ఏప్రిల్ ఏప్రిల్ 23న ఈ మూవీని రిలీజ్ చేస్తున్నారు.

సూప‌ర్ గుడ్ ఫిలిమ్స్ నిర్మిస్తున్న ఈ చిత్రానికి య‌స్‌య‌స్‌. రాజు అనే కొత్త ద‌ర్శ‌కుడు దర్శకత్వం వహించాడు. ఈ సంద‌ర్భంగా చిత్ర ప్రమోషన్స్ వేగవంతం చేసింది యూనిట్. ఇందులో భాగంగా తాజాగా ఓ కార్యక్రమంలో పాల్గొన్న హీరోయిన్ ప్రియా ప్రకాష్ వారియర్ చిత్రంలో తన క్యారెక్టర్ ఎలా ఉంటుందనే విషయాన్ని రివీల్ చేసింది.

ఇష్క్ మూవీలో తన పాత్ర పేరు అనసూయ అని, ఈ రోల్ చాలా కొత్తగా విభిన్నంగా ఉంటుందని చెప్పింది ప్రియా. వెండితెరపై విలేజ్ అమ్మాయిగా కనిపించబోతున్నట్లు తెలిపింది. సెల్ఫ్ రెస్పెక్ట్‌ ఉన్న కాలేజ్‌ అమ్మాయిగా నేను చేసిన ఈ పాత్ర మీ అందరికీ నచ్చుతుందనే నమ్మకం ఉందని ఆమె చెప్పింది.

ఇష్క్.. 'నాట్ ఎ ల‌వ్ స్టోరీ' అంటూ చాలా డిఫరెంట్‌గా ప్రేక్షకుల ముందుకు రాబోతున్న ఈ సినిమాకు సంబంధించి ఇప్పటికే విడుదలైన పోస్టర్స్, ట్రైలర్, ఇతర అప్‌డేట్స్ ఆసక్తి రేకెత్తించాయి. ఎన్వీ ప్రసాద్, పారస్ జైన్ వాకాడ అంజన్ కుమార్ నిర్మిస్తున్న ఈ మూవీకి మహతి స్వర సాగర్ సంగీతం అందించారు. యూత్‌ఫుల్ ఎంటర్టైనర్‌గా ఈ మూవీ ఎంతగానో అలరిస్తుందని చిత్రయూనిట్ ఆశాభావం వ్యక్తం చేస్తోంది. చూడాలి మరి ఈ సినిమా ప్రియా కెరీర్‌కు ఏ మేర ప్లస్ అవుతుందనేది!.