ఈజీగా చేసుకునే అరటికాయ - క్యారెట్‌ గారెలు!

Written by : smtv Desk | Fri, Nov 05, 2021, 04:14 PM

అరటికాయ, క్యారెట్ శరీరానికి ఎంత మేలు చేస్తాయో మనందరికీ తెలుసు. విడివిడిగా తింటేనే ఎన్నో పోషకాలను పొందుతాము. అలాంటి కలిపి తింటే ఇంకెంత లాభమో చెప్పాల్సిన అవసరం లేదు. అదికూడా గారెల రూపంలో తీసుకుంటే.. ఎవ్వరైనా సరే లొట్టలేసుకుంటూ తినాల్సిందే. అరటికాయ- క్యారెట్‌ గారెల తయారీ విధానం కూడా సులభంగా ఉంటుంది. పిల్లలకు మంచి ఆరోగ్యం కూడా. స్కూల్ నుంచి రాగానే ఇష్టంగా తినే ఈ స్నాక్ తయారీ విధానాన్ని చూద్దామా..
కావాల్సిన పదార్థాలు: ఉడికించిన అరటికాయ (తొక్కతో పాటు)- ఒకటి, బియ్యం పిండి - కప్పు, క్యారెట్‌ తురుము - కప్పు, ఉల్లిపాయ - ఒకటి, వెల్లుల్లి రెబ్బలు - పది, పచ్చిమిర్చి - ఐదు, కొత్తిమీర తురుము - అరకప్పు, ఉప్పు - తగినంత, జీలకర్ర - చెంచా, నూనె - వేయించడానికి సరిపడా.
తయారుచేసే విధానం
* ముందుగా ఉల్లిపాయ, పచ్చిమిర్చి, వెల్లుల్లి, కొద్దిగా ఉప్పును మిక్సీలో వేసి పేస్టు సిద్ధం చేసుకోవాలి.
* తర్వాత ఓ గిన్నెలో ఉడికించిన అరటికాయను తొక్క తీసి ముక్కలుగా కోసుకుని మెత్తగా చేసుకోవాలి. ఇప్పుడు దీనిలో క్యారెట్‌ తురుము, తగినంత బియ్యం పిండి వేసుకుని కలుపుకోవాలి.
* ఈ మిశ్రమంలో ముందుగా సిద్ధం చేసుకున్న పేస్టుతో పాటు తగినంత ఉప్పు, జీలకర్ర, కొత్తిమీర, కరివేపాకు వేసి గారెల పిండిలా కలుపుకోవాలి.
* ఈ మిశ్రమాన్ని గారెల్లా వత్తి కాగిన నూనెలో వేయించి తీస్తే రుచికరమైన అరటికాయ క్యారెట్‌ గారెలు రెడీ అయినట్లే.. సాయంత్రపు స్నాక్స్‌గా వీటిని ఎంజాయ్ చేస్తూ తినవచ్చు. టమాటా సాస్‌తో తింటే మరింత రుచి వీటి సొంతం... చేసేయండి మరి.