డబ్బు కోసమే ఫ్రస్ట్రేషనే! అందరికి అదే అవసరం కదా!!

Written by : smtv Desk | Fri, Nov 19, 2021, 12:16 PM

రీసెంట్‌గా ‘నారప్ప’ సినిమాతో అలరించిన విక్టరీ వెంకటేష్.. మరికొద్ది రోజుల్లో ‘దృశ్యం2’ సినిమాతో ప్రేక్షకుల ముందుకు రాబోతున్నారు. ఈ నెల 25న ఓటీటీ వేదిక అమెజాన్‌ ప్రైమ్‌‌లో ఈ మూవీ రిలీజ్ కానుంది. ఈ సందర్భంగా చిత్ర ప్రమోషన్స్ చేపట్టిన వెంకటేష్‌, మీడియాతో మాట్లాడుతూ తన కెరీర్‌కి సంబంధించిన పలు విషయాలపై ఓపెన్ అయ్యారు. ఈ మేరకు తన తదుపరి చిత్రాల గురించి చెప్పుకొచ్చారు.

ఈ క్రమంలోనే F2 సినిమాలోలాగే F3లో కూడా ఫ్రస్ట్రేషన్‌ ఉంటుందా? అనే ప్రశ్నపై ఆసక్తికరంగా బదులిచ్చారు వెంకటేష్. ఇప్పుడంతా ఫ్రస్ట్రేషనే కదా, తప్పదు మరి అంటూ కౌంటర్ వేశారు. కాకపోతే ఇందులో డబ్బుకోసం పడే ఫ్రస్ట్రేషన్‌. ప్రతి ఒక్కరికీ అదే అవసరం కదా. అందుకే అందరికీ కనెక్ట్‌ అయ్యేలా ఉంటుందని అన్నారు. మా ఆసనాలు, హావభావాలు అవన్నీ మీరు తెరపై చూడాల్సిందే అని ఆయన పేర్కొన్నారు. అలాగే రానాతో కలిసి ‘రానా నాయుడు’ చేస్తున్న వెంకీమామ.. ఈ మూవీలో చాలా భిన్నమైన లుక్‌లో కనిపిస్తానని చెప్పారు. అదేవిధంగా నెట్‌ఫ్లిక్స్‌ కోసం ఈ సినిమా చేస్తున్నట్లు తెలిపారు.

ఇక F3 సినిమా విషయానికొస్తే.. విక్టరీ వెంకటేష్, మెగా ప్రిన్స్ వరుణ్ తేజ్ హీరోలుగా, తమన్నా, మెహరీన్‌ హీరోయిన్లుగా నటిస్తున్న చిత్రమిది. గతంలో వచ్చి సూపర్ డూపర్ హిట్ సాధించిన F2 సినిమాకు సీక్వల్‌గా ఈ మూవీని ప్రేక్షకుల ముందుకు తెస్తున్నారు డైరెక్టర్ అనిల్ రావిపూడి. ఈ మూవీని దిల్ రాజు సమర్పణలో శ్రీ వెంకటేశ్వర క్రియేషన్స్‌పై శిరీష్ నిర్మిస్తున్నారు. ప్రస్తుతం ఈ సినిమా షూటింగ్ చివరిదశకు చేరుకుంది. వచ్చే ఏడాది వేసవిలో ఈ మూవీ రిలీజ్ చేయనున్నారు మేకర్స్.