ఇలా చేస్తే పీఎఫ్ అకౌంట్ ఇన్‌యాక్టివ్ అవ్వొచ్చు

ఉద్యోగం చేసే ప్రతి ఒక్కరికీ పీఎఫ్ అకౌంట్ ఉంటుంది. ఎంప్లాయీస్ ప్రావిడెంట్ ఫండ్ ఆర్గనైజేషన్ EPFO పీఎఫ్ అకౌంట్ సేవలు అందిస్తుంది. ఉద్యోగి వేతనంలో ప్రతి నెలా కొంత భాగం పీఎఫ్ అకౌంట్‌కు వెళ్లిపోతుంది. ఉద్యోగి బేసిక్ శాలరీ, డీఏలో 12 శాతం పీఎఫ్ ఖాతాలో జమ అవుతుంది. అలాగే కంపెనీలు కూడా ఇదే మొత్తంలో ఉద్యోగి పీఎఫ్ ఖాతాకు డబ్బులు కంట్రిబ్యూట్ చేస్తాయి.

పీఎఫ్ అకౌంట్ కలిగిన వారు కచ్చితంగా కొన్ని విషయాలు తెలుసుకోవాలి. ఈపీఎఫ్‌వో రూల్స్‌పై అవగాహన ఉండాలి. లేదంటే ఇబ్బందులు పడాల్సి వస్తుంది. పీఎఫ్ అకౌంట్ ఎప్పుడు ఇన్‌యాక్టివ్ అవుతుందో.. అంటే పనిచేయకుండా పోతుందో ఇప్పుడు ఒకసారి తెలుసుకుందాం.

- ఉద్యోగి జాబ్ మారినప్పుడు కొత్త కంపెనీకి పాత పీఎఫ్ అకౌంట్‌‌ను కచ్చితంగా ట్రాన్స్‌ఫర్ పెట్టుకోవాలి. 36 నెలలుగా పీఎఫ్ అకౌంట్‌లో ఎలాంటి ట్రాన్సాక్షన్లు లేకపోతే.. అకౌంట్ ఇన్‌యాక్టివ్ అవుతుంది. ఈపీఎఫ్‌వో అలాంటి అకౌంట్లను ఇన్‌ఆపరేటివ్ కేటగిరిలో పెట్టేస్తుంది.
- అలాగే పీఎఫ్ అకౌంట్ కలిగిన వారు విదేశాల్లో శాశ్వతంగా సెటిల్ అయిపోతే.. అప్పుడు కూడా పీఎఫ్ అకౌంట్ ఇన్‌యాక్టివ్ అవుతుందని గుర్తించాలి.
- పీఎఫ్ అకౌంట్ కలిగిన వారు మరణిస్తే.. అప్పుడు పీఎఫ్ అకౌంట్ ఇన్‌యాక్టివ్ అవుతుంది. అలాగే ఉద్యోగులు వారి పీఎఫ్ ఖాతా నుంచి పూర్తి డబ్బులను విత్‌డ్రా చేసుకుంటే.. అలాంటప్పుడు కూడా పీఎఫ్ అకౌంట్ ఇన్‌యాక్టివ్ అయిపోవచ్చు.
-ఇంకా పీఎఫ్ అకౌంట్‌‌లోని డబ్బులకు ఏడేళ్లలో ఎలాంటి క్లెయిమ్ రాకపోతే.. అప్పుడు ఆ పీఎఫ్ డబ్బులను సీనియర్ సిటిజెన్స్ వెల్ఫేర్ ఫండ్‌లోకి ట్రాన్స్‌ఫర్ చేసేస్తారు. 25 ఏళ్లలోపు ఈ డబ్బులను సరైన ఆధారాలు సమర్పించి క్లెయిమ్ చేసుకునే వెసులుబాటు ఉంటుంది.

కాగా ప్రావిడెంట్ ఫండ్ సబ్‌స్క్రైబర్లు ఈ ఏడాది చివరి నాటికి ఈపీఎఫ్ అకౌంట్లలో నామినీ పేరును యాడ్ చేసుకోవాలని. ఒకవేళ నామినీ పేరును యాడ్ చేయకపోతే పలు ప్రయోజనాలను ఉద్యోగులు కోల్పోవాల్సి వస్తుందని ఈపీఎఫ్ఓ పేర్కొంది. దీని కోసం ఈ డిసెంబర్ 31 లోపల నామినీ పేరును తమ అకౌంట్లకు యాడ్ చేసుకోవాలని, ఆన్‌లైన్‌‌లోనే ఈ పని పూర్తి చేసుకోవచ్చని తెలిపింది.

పీఎఫ్ ఖాతాదారులకి ఏమైనా జరిగితే, వారి డిపెండెంట్లు అంటే కుటుంబ సభ్యులకు ఇన్సూరెన్స్, పెన్షన్ వంటి బెనిఫిట్స్ లభిస్తాయి. అందుకే నామినీ పేరును కచ్చితంగా యాడ్ చేసుకోవాలి. లేదంటే అప్‌డేట్‌ అయినా చేసుకోవచ్చు. దీని కోసం ఎక్కడికీ వెళ్లాల్సిన పని లేదు. ఆన్‌లైన్‌లోనే పని పూర్తి చేసుకోవచ్చు.