ఎల్‌ఐసీ హోల్ లైఫ్ ఇన్సూరెన్స్...ఏటా రూ.40 వేలు

మీరు ఎల్‌ఐసీ పాలసీ తీసుకోవాలని భావిస్తున్నారా? కుటుంబ ఆర్థిక భద్రత కోసం ఈ నిర్ణయం తీసుకున్నారా? అలాగే భవిష్యత్ ఆర్థిక లక్ష్యాలకు అనుగుణంగా పాలసీ పొందాలని యోచిస్తున్నారా? అయితే మీకు శుభవార్త. ఎల్ఐసీ ఎన్నో రకాల పాలసీలను అందిస్తోంది. వీటిల్లో మీకు నచ్చిన ప్లాన్‌ను ఎంచుకోవచ్చు.

ఎల్‌ఐసీ అందిస్తున్న పాలసీల్లో జీవన్ ఉమాంగ్ కూడా ఒకటి. ఈ పాలసీ తీసుకోవడం వల్ల పలు రకాల ప్రయోజనాలు పొందొచ్చు. మీకు ఏమైనా అయితే మీ కుటుంబానికి ఆర్థిక భద్రత లభిస్తుంది. మీరు జీవించి ఉంటే.. ప్రతి ఏటా చేతికి డబ్బులు వస్తూనే ఉంటాయి. ఇలా మీరు జీవించినంత కాలం ప్రతి సంవత్సరం డబ్బులు మీకు అందుతాయి.

ఇంకా మెచ్యూరిటీ సమయంలో మీ పాలసీ డబ్బులు, బోనస్ వంటివి కూడా అందజేస్తారు. అందుకే ఈ పాలసీ తీసుకోవడం పలు రకాల బెనిపిట్స్ లభిస్తున్నాయని చెప్పుకోవచ్చు. ఎల్‌ఐసీ జీవన్ ఉమాంగ్ పాలసీ తీసుకోవడం వల్ల ఎంత ప్రీమియం కట్టాలి? ఎన్నేళ్లు కట్టాలి? ఎంత డబ్బు చేతికి వస్తుందనే వివరాలు ఇప్పుడు తెలుసుకుందాం.

55 ఏళ్లలోపు వయసు ఉన్న వారు ఈ పాలసీ తీసుకోవడానికి అర్హులు. ఇది హోల్ లైఫ్ పాలసీ. పాలసీ ప్రీమియం టెన్యూర్ నాలుగు రకాలుగాఉంటుంది. 15 ఏళ్లు, 20 ఏళ్లు, 25 ఏళ్లు, 30 ఏళ్లు.. ఇలా మీకు నచ్చిన టెన్యూర్ ఎంచుకొని ప్రీమియం చెల్లిస్తూ వెళ్లొచ్చు. నెల, మూడు నెలలు, ఆరు నెలలు, ఏడాది చొప్పున ప్రీమియం డబ్బులు కట్టొచ్చు. మీకు ఎలా అనుగుణంగా ఉంటే అలా ప్రీమియం పేమెంట్‌ను సెట్ చేసుకోవచ్చు.

ఉదాహరణకు 25 ఏళ్ల వయసులో ఉన్న వారు ఈ పాలసీ తీసుకున్నారని అనుకుందాం. పాలసీ టర్మ్ 25 ఏళ్లు అనుకోవాలి. రూ.5 లక్షల బీమా మొత్తానికి పాలసీ తీసుకున్నారు. ఇప్పుడు నెలకు దాదాపు రూ.1600 ప్రీమియం కట్టాలి. మూడు నెలలకు అయితే దాదాపు రూ.5 వేలు, ఆరు నెలలకు అయితే రూ.9500 వరకు, ఏడాదికి అయితే రూ.18,951 చెల్లించాలి.

పాలసీ ప్రీమియం చెల్లింపు గడువు ముగిసిన తర్వాతి ఏడాది నుంచి ప్రతి సంవత్సరం బీమా మొత్తంలో 8 శాతాన్ని చెల్లిస్తారు. అంటే రూ.5 లక్షల పాలసీ తీసుకుంటే.. ప్రతి ఏటా రూ.40 వేలు వస్తాయి. ఇలా పాలసీదారుడు జీవించి ఉన్నంత కాలం (99 ఏళ్ల వరకు) వస్తూనే ఉంటాయి. 100 ఏళ్ల వరకు జీవించి ఉంటే.. అప్పుడు పాలసీ డబ్బులు, సింపుల్ రివిజనరీ బోనస్, ఫైనల్ అడిషన్ బోనస్ అన్నీ కలిపి అందిస్తారు. ఒకవేళ పాలసీదారుడు మరణిస్తే.. అప్పుడు నామినీకి పాలసీ డబ్బులు, బోనస్ వంటి వాటిని చెల్లిస్తారు.