ప్రపంచవ్యాప్తంగా 13 కోట్లు దాటిన కరోనా రోగులు.....భారత్‌లో ఒక్క రోజే 2 లక్షల కేసులు

దేశంలో కరోనా మహమ్మారి మరింత ఉగ్రరూపం దాల్చింది. బుధవారం ఉదయం నుంచి గురువారం ఉదయం వరకు రోజువారీ కేసులు, మరణాల్లో భారత్ కొత్త రికార్డు నెలకొల్పింది. ఏకంగా రెండు లక్షలకు పైగా కేసులు, వెయ్యికి పైగా మరణాలు చోటుచేసుకున్నాయి. గడిచిన 24 గంటల్లో 2,00,739 కొత్త కేసులు నిర్దారణ కాగా.. 1,038 మంది ప్రాణాలు కోల్పోయారు. దేశంలో గతేడాది వైరస్ మొదలైన తర్వాత తొలిసారిగా కోవిడ్ కేసులు, మరణాలు ఇంత పెద్ద సంఖ్యలో నమోదుకావడం ఇదే తొలిసారి.

ఇప్పటి వరకూ అమెరికా తర్వాత మరే దేశంలోనూ ఒక్క రోజే 2 లక్షలకుపైగా కేసులు నమోదుకాలేదు. అయితే, అమెరికాలో పాజిటివ్ కేసులు రెండు లక్షల మార్క్‌ను అందుకోడానికి 21 రోజులు పట్టగా.. భారత్‌లో కేవలం 11 రోజుల్లోనే ఈస్థాయికి చేరడం గమనార్హం. దేశంలో వరుసగా ఐదో రోజు లక్షన్నరకుపైగా కేసులు నిర్ధారణ కాగా.. వరుసగా తొమ్మిదో రోజు లక్ష దాటింది.

తాజా కేసులతో దేశంలో మొత్తం కోవిడ్ బాధితుల సంఖ్య దాంతో మొత్తం కేసుల సంఖ్య 1,40,74,564 కి చేరగా.. 1,73,123 మంది మృతిచెందారు. రోజువారి పాజిటివ్ కేసులు దేశంలో దాదాపు 10 రోజుల్లోనే రెట్టింపయ్యాయి. ప్రస్తుతం 14,71,877 యాక్టివ్ కేసులు ఉండగా.. ఈ రేటు పది శాతానికి చేరువ కావడం కలవరపెడుతోంది. గడచిన 24 గంటల్లో దేశవ్యాప్తంగా 93,528 మంది కొవిడ్ నుంచి కోలుకున్నారు. దీంతో మొత్తం రికవరీల సంఖ్య కోటీ 24 లక్షలను దాటేసింది.

అయితే, ఫిబ్రవరిలో 97 శాతానికి పెరిగిన రికవరీ రేటు..ఇప్పుడు 89 శాతానికి పడిపోవడం తీవ్ర ఆందోళన కలిగిస్తోంది. ఒక్కరోజే లక్షకు పైగా కొత్త కేసులు నమోదైన దేశాల జాబితాలో అమెరికా, భారత్ మాత్రమే ఉన్నాయి. గతంలో అమెరికాలో ఒకే రోజు అత్యధికంగా మూడు లక్షలకు పైగా రోజూవారీ కేసులు బయటపడ్డాయి.

రాబోయే రెండు మూడు వారాలు ఇదే పరిస్థితి కొనసాగి త్వరలోనే ఈ రికార్డును భారత్ అధిగమిస్తుందని నిపుణులు హెచ్చరిస్తున్నారు. ఎప్పటిలాగే మహారాష్ట్ర దాదాపు 59 వేల కేసులు, 178 మరణాలతో టాప్‌లో ఉంది. దేశ ఆర్ధిక రాజధాని ముంబయి నగరంలో కల్లోలం కొనసాగుతోంది. మహారాష్ట్ర తర్వాత దక్షిణాదిలో కేరళ, కర్ణాటక, తమిళనాడు, ఆంధ్రప్రదేశ్‌లో అత్యధికంగా కేసులు నమోదవుతున్నాయి. రాజధాని ఢిల్లీలోనూ 17,282 కేసులు బయటపడగా.. ఇప్పటి వరకూ ఇక్కడ నమోదయిన ఒక్క రోజు కేసుల్లో ఇదే అత్యధికం.