ఒప్పో రెనో 6 ప్రో 5జీ స్మార్ట్ ఫోన్ సేల్ స్టార్ట్

Written by : smtv Desk | Tue, Jul 20, 2021, 03:02 PM

ఒప్పో ఇటీవలే మనదేశంలో రెనో 6 5జీ, ఒప్పో రెనో 6 ప్రో 5జీ స్మార్ట్ ఫోన్లు లాంచ్ చేసిన సంగతి తెలిసిందే. ఇందులో ఒప్పో రెనో 6 ప్రో 5జీ స్మార్ట్ ఫోన్ సేల్ మనదేశంలో ఈరోజు(జులై 20వ తేదీ) జరగనుంది. ప్రారంభ ఆఫర్ కింద దీనిపై రూ.4,000 తగ్గింపును కూడా అందించారు.

ఇందులో కేవలం ఒక్క వేరియంట్ మాత్రమే అందుబాటులో ఉంది. 12 జీబీ ర్యామ్ + 256 జీబీ స్టోరేజ్‌తో వచ్చిన ఈ వేరియంట్ ధరను రూ.39,990గా నిర్ణయించారు. అరోరా, స్టెల్లార్ బ్లాక్ రంగుల్లో ఈ ఫోన్ కొనుగోలు చేయవచ్చు. హెచ్‌డీఎఫ్‌సీ బ్యాంకు కార్డులు, బజాన్ ఫిన్‌సర్వ్ ద్వారా ఈ ఫోన్లను కొనుగోలు చేస్తే రూ.4,000 తగ్గింపు లభించనుంది. పేటీయం ద్వారా 15 శాతం క్యాష్‌బ్యాక్‌ను కూడా అందించనున్నారు. ఫ్లిప్‌కార్ట్, రిలయన్స్ డిజిటల్, విజయ్ సేల్స్, క్రోమా, ఒప్పో ఆన్‌లైన్ స్టోర్లలో ఈ ఫోన్ అందుబాటులో ఉండనుంది.

ఇందులో 6.55 అంగుళాల ఫుల్‌హెచ్‌డీ+ కర్వ్‌డ్ అమోఎల్ఈడీ డిస్‌ప్లేను అందించారు. దీని స్క్రీన్ రిజల్యూషన్ 2400 x 1080 పిక్సెల్స్‌గా ఉంది. దీని స్క్రీన్ రిఫ్రెష్ రేట్ 90 హెర్ట్జ్‌గానూ, టచ్ శాంప్లింగ్ రేట్ 180 హెర్ట్జ్‌గానూ ఉంది. మీడియాటెక్ డైమెన్సిటీ 1200 ప్రాసెసర్‌పై ఈ ఫోన్ పనిచేయనుంది.

ఆండ్రాయిడ్ 11 ఆధారిత కలర్ఓఎస్ 11.3 ఆపరేటింగ్ సిస్టంపై ఈ ఫోన్ పనిచేయనుంది. ఇక కెమెరాల విషయానికి వస్తే.. ఇందులో వెనకవైపు మూడు కెమెరాలు ఉన్నాయి. వీటిలో ప్రధాన కెమెరా సామర్థ్యం 64 మెగాపిక్సెల్ కాగా, దీంతోపాటు 8 మెగాపిక్సెల్ అల్ట్రా వైడ్ యాంగిల్ సెన్సార్, 2 మెగాపిక్సెల్ మాక్రో కెమెరా కూడా ఉన్నాయి. సెల్ఫీలు, వీడియో కాల్స్ కోసం ముందువైపు 32 మెగాపిక్సెల్ కెమెరాను అందించారు.

12 జీబీ ర్యామ్, 256 జీబీ స్టోరేజ్ ఇందులో అందించారు. దీని బ్యాటరీ సామర్థ్యం 4500 ఎంఏహెచ్‌గా ఉంది. 65W ఫాస్ట్ చార్జింగ్ ఫీచర్ కూడా ఇందులో ఉంది. కనెక్టివిటీ ఫీచర్లు ఒప్పో రెనో 6 మాదిరిగానే ఉన్నాయి. దీని మందం 0.76 సెంటీమీటర్లు కాగా, బరువు 177 గ్రాములుగా ఉండనుంది.