శ్రీలంకపై రెండో వన్డేలో టీమిండియాకి ఫాస్ట్ బౌలర్ దీపక్ చాహర్ ఆపద్భాందవుడిగా మారాడు. తొలుత బంతితో రెండు వికెట్లు పడగొట్టిన దీపక్ చాహర్.. అనంతరం బ్యాటింగ్లోనూ ఏడో స్థానంలో వెళ్లి 82 బంతుల్లో 7x4, 1x6 సాయంతో 69 పరుగులు చేసి భారత్ జట్టుని గెలిపించాడు. 276 పరుగుల ఛేదనలో ఒకానొక దశలో 193/7తో నిలిచిన టీమిండియా చాహర్ జోరుతో మరో 5 బంతులు మిగిలి ఉండగానే 277/7తో గెలిచింది. దాంతో.. టీమిండియా నయా హీరోగా దీపక్ చాహర్ని అభివర్ణిస్తున్నారు. వాస్తవానికి దీపక్ చాహర్ క్రీజులోకి వెళ్లే సమయానికే భారత్ జట్టు 160/6తో పీకల్లోతు కష్టాల్లో నిలిచింది. అయినప్పటికీ.. శ్రీలంక టూర్లో చీఫ్ కోచ్గా ఉన్న రాహుల్ ద్రవిడ్.. దీపక్ చాహర్లో స్ఫూర్తి నింపి మరీ మైదానంలోకి పంపాడట. ఈ విషయాన్ని మ్యాచ్ తర్వాత దీపక్ చాహర్ స్వయంగా వెల్లడించాడు. దీపక్ చాహర్ హాఫ్ సెంచరీ ముగియగానే డ్రెస్సింగ్ రూము నుంచి డగౌట్లోకి వచ్చిన రాహుల్ ద్రవిడ్.. దీపక్ చాహర్ తమ్ముడు రాహుల్ చాహర్ వద్దకి వెళ్లి కొన్ని సూచనలు చేసి మళ్లీ వెళ్లిపోయాడు. అప్పుడు డ్రింక్స్ బాయ్గా పనిచేస్తున్న రాహుల్ చాహర్.. అనంతరం మైదానంలోకి వెళ్లి ద్రవిడ్ సూచనల్ని దీపక్ చాహర్కి వివరిస్తూ కనిపించాడు. ‘‘రాహుల్ ద్రవిడ్ సార్ అన్ని బంతుల్నీ ఆడాలని నాకు సూచించాడు. భారత్-ఎ జట్టు తరఫున నేను కొన్ని మ్యాచ్లు ఆడాను. ఆ నమ్మకంతో .. నెం.7లో నువ్వు చక్కగా బ్యాటింగ్ చేయగలవు అని చెప్పారు. సార్ నాపై నమ్మకం ఉంచారు. బహుశా రాబోవు మ్యాచ్ల్లో నాకు బ్యాటింగ్ అవకాశం పెద్దగా రాకపోవచ్చు’’ అని మ్యాచ్ తర్వాత దీపక్ చాహర్ చెప్పుకొచ్చాడు.
Rahul Dravid come out to the dugout and give advice to Rahul Chahar to pass Deepak Chahar. #INDvSL pic.twitter.com/1tu3QyTVhU
mdash; CricketMAN2 (@man4_cricket) July 20, 2021