అత్యంత చవకైన ఐఫోన్

     Written by : smtv Desk | Thu, Jul 22, 2021, 11:32 AM

అత్యంత చవకైన ఐఫోన్

ఐఫోన్ ఎస్ఈ(2022) స్మార్ట్ ఫోన్ వచ్చే సంవత్సరం లాంచ్ కానున్నట్లు లీకులు వస్తున్నాయి. ఇందులో యాపిల్ ఏ14 బయోనిక్ ప్రాసెసర్‌ను అందించనున్నట్లు సమాచారం. ఐఫోన్ ఎస్ఈ(2022) లేదా ఐఫోన్ ఎస్ఈ 3 అని దీనికి పేరు పెట్టే అవకాశం ఉంది. ఈ ఫోన్ గత కొంతకాలం నుంచి వార్తల్లో ఉంటూ వస్తుంది. ప్రస్తుతం అందుబాటులో ఉన్న ఐఫోన్ ఎస్ఈ(2020) ఏ13 బయోనిక్ చిప్‌ను అందించారు. ఐఫోన్ ఎస్ఈ కొత్త వెర్షన్‌లో యాపిల్ ఏ14 బయోనిక్‌ను అందిస్తే.. ఐఫోన్ 12 సిరీస్, లేటెస్ట్ ఐప్యాడ్ ఎయిర్‌‌లతో సమానంగా దీని పనితీరు ఉండనుంది.

ఈ కొత్త ప్రాసెసర్ తయారీకి కావాల్సిన పరికరాల కోసం తైవాన్ సెమీకండక్టర్ తయారీ కంపెనీ అయిన క్సిన్‌టెక్ అనే సంస్థతో యాపిల్ ఒప్పందం కుదుర్చుకున్నట్లు తెలుస్తోంది. గతంలో కూడా ఐఫోన్ ఎస్ఈ మోడల్స్ ప్రాసెసర్ల కోసం క్సిన్‌టెక్ పరికరాలను సరఫరా చేసింది. దీంతో ఐఫోన్ ఎస్ఈ(2022)లో 5జీ కనెక్టివిటీ కూడా ఉండనుందని అర్థం చేసుకోవచ్చు.

దీంతో అత్యంత చవకైన యాపిల్ 5జీ ఫోన్‌గా ఐఫోన్ ఎస్ఈ మూడో తరం ఫోన్ నిలవనుంది. దీన్ని యాపిల్ విశ్లేషకుడు మింగ్ చుయ్ కువో కూడా తెలిపారు. ఐఫోన్ ఎస్ఈలో అప్‌గ్రేడెడ్ ప్రాసెసర్ ఉండనుందని ఈయన గతనెలలోనే షేర్ చేశారు. ఇక డిజైన్ విషయంలో మాత్రం ప్రస్తుతం ఉన్న ఐఫోన్ ఎస్ఈ(2020) తరహాలోనే తర్వాతి తరం ఐఫోన్ ఎస్ఈ కూడా ఉండనుందని తెలుస్తోంది.

మొట్టమొదటి ఐఫోన్ ఎస్ఈ 2016లో లాంచ్ అయింది. ఐఫోన్ 5ఎస్ స్థానంలో దీన్ని అందుబాటులోకి తీసుకువచ్చారు. యాపిల్ ఏ9 ప్రాసెసర్‌తో ఈ ఫోన్ లాంచ్ కానుంది. 2020లో దీనికి తర్వాతి వెర్షన్‌గా ఐఫోన్ ఎస్ఈ(2020)ని కంపెనీ లాంచ్ చేసింది. ఇందులో ఐఫోన్ 8 తరహా డిజైన్‌ను అందించారు. యాపిల్ ఏ13 బయోనిక్ ప్రాసెసర్‌తో ఈ ఫోన్ లాంచ్ అయింది.


తర్వాత రాబోయే ఐఫోన్ డిజైన్‌లో కూడా పెద్దగా మార్పులు చేసే అవకాశం లేదు. కేవలం ప్రాసెసర్, హార్డ్‌వేర్ విషయంలో మాత్రం కాస్త అప్‌గ్రేడ్ చేసే అవకాశం ఉంది. ఐఫోన్ ఎస్ఈ 3లో 4.7 అంగుళాల డిస్‌ప్లే ఉండనుందని గతంలో వార్తలు వచ్చాయి. ఐఫోన్ ఎస్ఈ(2020)లో కూడా అదే తరహా డిజైన్ అందించారు.





Untitled Document
Advertisements