టిమ్ సౌథీ, ఇయాన్ మోర్గాన్ తో అశ్విన్ గొడవ

Written by : smtv Desk | Wed, Sep 29, 2021, 11:16 AM

ఐపీఎల్‌లో ఢిల్లీ క్యాపిటల్స్ స్పిన్నర్ రవిచంద్రన్ అశ్విన్ సహనం కోల్పోయాడు. కోల్‌కతా నైట్‌రైడర్స్‌తో మంగళవారం షార్జా వేదికగా జరిగిన మ్యాచ్‌లో.. టిమ్ సౌథీ బౌలింగ్‌లో ఔటైన అశ్విన్ (9: 8 బంతుల్లో 1x4) పెవిలియన్‌కి వెళ్తుండగా ఫస్ట్ సౌథీ నోరుజారాడు. దాంతో.. పెవిలియన్‌కి వెళ్తున్న అశ్విన్ ఆగి టిమ్ సౌథీకి సమాధానం ఇస్తుండగా.. మధ్యలోకి కోల్‌కతా కెప్టెన్ ఇయాన్ మోర్గాన్ దూరాడు. దాంతో.. రెచ్చిపోయిన అశ్విన్ కోపంగా అతనిపైకి దూసుకెళ్లే ప్రయత్నం చేశాడు.

అశ్విన్‌ దూకుడు తెలిసిన కోల్‌కతా నైట్‌రైడర్స్ వికెట్ కీపర్ దినేశ్ కార్తీక్ వేగంగా స్పందించి.. అశ్విన్‌కి సర్దిచెప్పే ప్రయత్నం చేశాడు. అయినప్పటికీ.. అశ్విన్ చాలా కోపంగా మోర్గాన్ వైపు చూస్తూ.. పెవిలియన్‌కి వెళ్లాడు. అశ్విన్, దినేశ్ కార్తీక్ దేశవాళీలో తమిళనాడు టీమ్‌కి కలిసి ఆడుతున్న విషయం తెలిసిందే. ఇక 2019 ఐపీఎల్ సీజన్‌లో ఇంగ్లాండ్‌కి చెందిన ఓపెనర్ జోస్ బట్లర్‌ని అశ్విన్ మాన్కడింగ్ చేయగా.. అప్పట్లో ఆ దేశ క్రికెటర్ల స్పందించిన తీరుపై అశ్విన్ ఇప్పటికీ కోపంగానే ఉన్నాడు. దాంతో.. సీన్‌లోకి మోర్గాన్ ఎంటరవగానే అశ్విన్ కోపం కట్టలు తెంచుకుంది. అయితే.. దినేశ్ కార్తీక్ మధ్యలోకి రావడంతో గొడవ సర్దుమణిగింది.

ఈ గొడవ జరిగిన కొద్దిసేపటి తర్వాత ఇయన్ మోర్గాన్ (0: 2 బంతుల్లో) బ్యాటింగ్‌కిరాగా.. అశ్విన్ అతడ్ని ఔట్ చేసి ప్రతీకారం తీర్చుకున్నాడు. పెవిలియన్‌కి వెళ్తున్న మోర్గాన్ సమీపంలోకి వెళ్లిన అశ్విన్ గట్టిగా అరుస్తూ సంబరాలు చేసుకున్నాడు. అయితే.. ఈ గొడవపై మ్యాచ్ రిఫరీకి ఫీల్డ్ అంపైర్లు ఎలాంటి ఫిర్యాదు చేయలేదని తెలుస్తోంది.