రైలు ప్రయాణంలో ఈ పొరపాట్లు అసలు చెయ్యొద్దు..

వేసవి సెలవులు వచ్చేసాయి. సెలవులకు ఊరికి వెళ్ళాలి అనుకునే వారు దూర ప్రాంతం అయితే వారు ఎక్కువగా ట్రైన్ జర్నీ చేసే అవకాశం ఉంటుంది. ట్రైన్ జర్నీ చేయడానికి రకరకాల కారణాలు ఉండొచ్చు. ఇతర జర్నీలతో పోలిస్తే రైళ్లలో ప్రయాణిస్తే చార్జీల భారం తక్కువ. అలాగే ప్రయాణం సౌకర్యవంతంగా ఉంటుంది. అందుకే చాలా మంది ట్రైన్ జర్నీకే పాధాన్యతనిస్తారు. అయితే రైల్వే ప్రయాణం చేసే వారు కచ్చితంగా కొన్ని విషయాలు తెలుసుకోవాలి. లేదంటే ఇబ్బందులు పడాల్సి వస్తుంది. కొన్నిరకాల పొరపాట్లు చేస్తే పెనాల్టీలు పడతాయి. ఇంకా జైలు శిక్ష కూడా అనుభవించాల్సి రావొచ్చు.
* ట్రైన్‌లో చెత్త పడేయడం, తోటి ప్రయాణికులకు విసుగు వచ్చేలా ప్రవర్తించడం వంటివి చేయవద్దు. ఇలా చేయడం తప్పు. చాలా మందికి ఈ విషయం తెలిసి ఉండకపోవచ్చ. అయితే మీరు మాత్రం చెత్తను పడేయవద్దు. రైల్వే చట్టంలోని సెక్షన్ 145 (బీ) కింద ఇలా చేయడం శిక్షార్హం. తొలిసారి ఇలా చేస్తే రూ.100 జరిమానా విధిస్తారు. రెండో సారి కూడా ఇదే రిపీట్ చేస్తే రూ.250 పెనాల్టీ పడుతుంది. లేదంటే నెల రోజులు జైలుకు పోవాల్సి రావొచ్చు.
* మీరు ట్రైన్‌ ఎక్కితే మీకు అక్కడక్కడ యాడ్స్‌ పోస్టర్లు కనిపిస్తూ ఉండొచ్చు. అయితే ఇలా ట్రైన్‌లో పోస్టర్లు అతికించడం కూడా తప్పే. మీరు ఎప్పటికీ ఇలా చేయొద్దు. రైల్వేస్ యాక్ట్‌లోని సెక్షన్ 166 (బీ) కింద ఇలా చేయడం శిక్షార్హం. ఈ తప్పు చేయడం వల్ల ఆరు నెలలు జైలు శిక్ష పడొచ్చు. రూ. 500 జరిమానా చెల్లించుకోవాలి.
* రైల్వే ప్రయాణం చేయడానికి ముందు కచ్చితంగా ట్రైన్ టికెట్ కొనుక్కోవాలి. లేదంటే రైల్వే పాస్ ఉన్నా సరిపోతుంది. ఈ రెండూ లేకుండా మీరు ట్రైన్‌లో జర్నీ చేస్తే పెనాల్టీ పడుతుంది. అందుకే ఈ తప్పు ఎప్పటికీ చేయొద్దు. రైల్వే చట్టంలోని సెక్షన్ 138 కింద ఇది శిక్షార్హం.
* మోసపూరితంగా ప్రయాణం చేస్తున్నారని తేలితే అప్పుడు రూ.1000 జరిమానా పడుతుంది. రైల్వే చట్టంలోని సెక్షన్ 137 కింద మీరు ఈ జరిమానా చెల్లించుకోవాలి. లేదంటే ఆరు నెలల జైలు శిక్ష కూడా పడొచ్చు. మీరు ఏ క్లాస్ టికెట్ అయితే తీసుకున్నారో అందులోనే జర్నీ చేయాల్సి ఉంటుంది. సాధారణ క్లాస్ టికెట్ తీసుకొని ఏసీ క్లాస్‌లో జర్నీ చేయాలని చూస్తే అది తప్పే అవుతుంది. ఇలాంటి పనులు చేయొద్దు.
* అంతేకాకుండా ట్రైన్‌లో జర్నీ చేసేటప్పుడు కొన్ని వస్తువులను తీసుకెళ్లకూడదు. అగ్ని ప్రమాదాలకు కారణమయ్యే వాటిని రైళ్లలో తీసుకెళ్లకూడదు. మీరు ఇలాంటివి చేస్తే ఇబ్బందులు పడాల్సి వస్తుంది. పెట్రోల్, డీజిల్, గ్యాస్ సిలిండర్ వంటివి తీసుకెళ్లొద్దు. అలాగే ట్రైన్స్‌లో సిగరెట్లు కాల్చడం వంటివి చేయొద్దు.