జైలు టూరిజంలో రూ.500 చెల్లిస్తే చాలు ఒక రోజు ఖైదీలా ఉండొచ్చు!

     Written by : smtv Desk | Fri, Sep 30, 2022, 11:56 AM

 జైలు టూరిజంలో రూ.500 చెల్లిస్తే చాలు ఒక రోజు ఖైదీలా ఉండొచ్చు!

ఎవరికైనా జైల్ జీవితం ఎలా ఉంటుందో ప్రత్యక్షంగా తెలుసుకోవాలనుకుంటున్నారా అయితే ఉత్తరాఖండ్‌లోని హల్‌ద్వానీజైలు భవనాలను టూరిస్టుల కొరకు అభివృద్ధి చేసి జైల్ టూరిజాన్ని ప్రోత్సహించేందుకు అధికారులు ఏర్పాట్లు చేస్తున్నారు. దీంతో వాళ్ల కోరిక నెరివేరినట్లు అవుతుంది.
చాలా మంది నేరస్థులు వారు చేసిన పనులకు జైల్ జీవితం అనుభవిస్తారు. అది నిజంగా నరకప్రాయంగా ఉంటుందని అంటారు ఆ జీవితం గడిపిన పాత నేరస్థులు. బరాక్‌లో ఒంటరిగా ఉండాలనే ఆలోచన కూడా మనిషికి ఒకరకమైన అనుభూతిని కలిగిస్తుంది. నిజం చెప్పాలంటే అది ఒక భయానక అనుభవం అని కూడా చెప్పొచ్చు. అలాంటిది కొంత మంది ఔత్సాహికులకు జైల్ జీవితం ఎలా ఉంటుందనే ఆలోచన కూడా వస్తుంది. దీంతో వారికి ఏ నేరం చేయకపోయినా దాన్ని అనుభవపూర్వకంగా తెలుసుకోవాలనే కుతూహల కలుగుతుంది. అలాంటివారి కోసమే ఉత్తరాఖండ్ పోలీస్ అధికారులు కొత్త చర్యలు చేపట్టారు.
అయితే, దీన్ని పర్యాటక రంగంలో ప్రయత్నించాలని అక్కడి అధికారులు భావించారు. అందుకే టూరిస్టులకు కూడా ఈ సౌకర్యాన్ని కల్పించడానికి మెరుగైన ఏర్పాట్లు చేస్తున్నారు. ఇప్పటికే కరోనా పుణ్యమా అని టూరిజం ఇండస్ట్రీలో కొత్తగా హోమ్‌స్టేల సదుపాయం దొరుకుతుండగా.. ఇప్పుడు ఇలాంటి జైల్ టూరిజం కూడా పర్యాటకులకు కొత్త అనుభూతిని అందించే అవకాశం ఉంది. దీంతో జైల్ టూరిజం భవిష్యత్‌లో ఎలాంటి స్థితికి చేరుకుంటుందో చూడాలి. అయితే, ఈ జైల్ టూరిజాన్ని అందరి కన్నా ముందే తెలంగాణలో ప్రయోగాత్మకంగా చేపట్టడం గమనార్హం. సంగారెడ్డిలో ఈ జైల్ టూరిజాన్ని మొట్టమొదటిసారి ప్రవేశపెట్టారు. దీంతో చాలా మంది ఔత్సాహికులు ఆ అనుభవాన్ని ప్రత్యక్షంగా రుచిచూశారు. ఇప్పుడు ఉత్తరాఖండ్‌లోనూ అలాంటి సౌకర్యం కల్పించనుండటం విశేషం.
ఉత్తరాఖండ్‌లోని హల్‌ద్వానీ జైల్‌కు 100 ఏళ్లకుపైగా ఘన చరిత్ర ఉంది. దీన్ని 1903లో నిర్మించగా ప్రస్తుతం సరైన మెయింటేనెన్స్ లేక ఆ కారాగారంలోని కొన్ని పరిసరాలు, భవనాలు నిరపయోగంగా మారాయి. దీంతో అధికారులు వాటిని ప్రత్యేకంగా తీర్చిదిద్ది అక్కడే టూరిస్టులకు లేదా జైల్ జీవితం అనుభవించాలనుకునేవారికి బరాక్‌లో ఉండే విధంగా విడిది ఏర్పాట్లు చేస్తున్నారు. అయితే, అందులో ఒక్క రోజు ఉండాలంటే రూ.500 చెల్లించాల్సి ఉంటుంది. దీంతో మీరు నేరం చేయకపోయినా ఖైదీ దుస్తుల్లో ఆ జైల్లో ఉండొచ్చు. ఇది త్వరలోనే అందుబాటులోకి రానుంది. ఇక్కడ మరో ఆసక్తికరమైన విషయం ఏమిటంటే కొంత మంది వ్యక్తులు కావాలనే జైల్ జీవితాన్ని గడపడానికి ఆసక్తి చూపుతున్నారని అక్కడి అధికారులు అంటున్నారు. వారి జాతకాల్లో జైల్ జీవితం గడపాలని రాసిపెట్టి ఉందని జ్యోతిష్యులు చెప్పడంతో ఈ రకంగానైనా దాన్ని అనుభవించాలని అనుకుంటున్నట్లు వివరించారు.





Untitled Document
Advertisements