జపాన్ లో బాహుబలి 2 ని మించిపోయిన ఆర్ఆర్ఆర్..

     Written by : smtv Desk | Sat, Nov 26, 2022, 10:33 AM

జపాన్ లో బాహుబలి 2 ని మించిపోయిన ఆర్ఆర్ఆర్..

జపనీస్ భాషలోకి అనువాదమయ్యే ఇండియన్ మూవీస్‌ను చూసే అలవాటు జపాన్‌లోని సినీ ప్రేక్షకులకు ఎప్పటి నుంచో ఉంది. రజినీకాంత్ హీరోగా వచ్చిన ‘ముత్తు’ సినిమాను జపనీస్ ఆడియన్స్ ఇరగబడి చూశారు. ఆ తరవాత మళ్లీ అంత ఆదరణ పొందిన చిత్రం ‘బాహుబలి 2’. ఈ సినిమాతో ప్రభాస్, రానా, రాజమౌళి పేర్లు జపాన్‌లో మారుమోగిపోయాయి. అయితే, అదే దర్శకుడి నుంచి వచ్చిన మరో అద్భుతమైన సినిమా ఆర్ఆర్ఆర్ పై కూడా జపాన్ ప్రేక్షకులు విపరీతమైన ఆదరణ చూపిస్తున్నారు. ‘బాహుబలి 2’ను మించి ఆర్ఆర్ఆర్ ను ఇరగబడి చూసేస్తున్నారు.
ప్రపంచ వ్యాప్తంగా రూ.1200 కోట్లకు పైగా గ్రాస్ వసూలు చేసిన ఆర్ఆర్ఆర్ సినిమా.. జపాన్‌లో అక్టోబర్ 21న విడుదలైంది. ఇప్పుడు ఈ సినిమా జపాన్‌లో అత్యధికంగా వసూలు చేసిన రెండో ఇండియన్ ఫిలింగా నిలిచింది. ‘బాహుబలి 2’బాక్సాఫీసు కలెక్షన్‌ను ఆర్ఆర్ఆర్ బీట్ చేసింది. జపాన్ వ్యాప్తంగా 209 స్క్రీన్స్, 31 ఐమ్యాక్స్ స్క్రీన్స్‌లో విడుదలైన ఈ సినిమా.. అక్కడ అత్యంత వేగంగా 300 మిలియన్ జపనీస్ యెన్‌లు వసూలు చేసిన చిత్రంగా చరిత్ర సృష్టించింది. విడుదలైన 34 రోజుల్లో 305 మిలియన్ జపనీస్ యెన్‌లు రాబట్టింది. ఇండియన్ కరెన్సీ ప్రకారం రూ.17.9 కోట్ల మేర గ్రాస్ వసూలు చేసింది. ఈ 34 రోజుల్లో 2,03,867 మంది ఆర్ఆర్ఆర్ సినిమాను చూశారు.
ఇప్పటి వరకు 300 మిలియన్ యెన్‌ల కలెక్షన్‌తో జపాన్‌లో ‘బాహుబలి 2’ రెండో స్థానంలో ఉండేది. ఇప్పుడు 305 మిలియన్ యెన్‌లతో రెండో స్థానాన్ని ఆర్ఆర్ఆర్ క్రమించింది. అంతేకాదు, అగ్రస్థానంపై కన్నేసింది. ప్రస్తుతం అగ్రస్థానంలో రజినీకాంత్ ‘ముత్తు’ సినిమా ఉంది. ఈ చిత్రం ఏడాది పాటు జపాన్‌లో ప్రదర్శితమై 400 మిలియన్ యెన్‌లు వసూలు చేసింది. అంటే, సుమారు రూ.23.5 కోట్లు. ఆర్ఆర్ఆర్ 34 రోజుల్లోనే 300 మిలియన్ యెన్‌లు రాబట్టింది. కాబట్టి, మరో 100 మిలియన్ యెన్‌లు ఈ సినిమాకు కష్టం కాదు. జపాన్‌లో సినిమాలు సుధీర్ఘ కాలంపాటు థియేటర్లలో ప్రదర్శితమవుతాయి. ‘బాహుబలి 2’కూడా 6 నెలలు ఆడింది. కాబట్టి, ఆర్ఆర్ఆర్ జపాన్‌లో అత్యధికంగా వసూలు చేసిన ఫస్ట్ ఇండియన్ మూవీగా నిలుస్తుందనే నమ్మకం గట్టిగా కలుగుతోంది. ఇదిలా ఉంటే, జపాన్‌లో అత్యధికంగా బాక్సాఫీసు కలెక్షన్ వసూలు చేసిన టాప్ 3 మూవీస్‌లో సౌత్ ఇండియన్ సినిమాలే ఉండటం విశేషం. అయితే, ఆర్ఆర్ఆర్ జపాన్‌లో ఇంత ఎక్కువ సక్సెస్ కావడానికి ప్రధాన కారణం దర్శకధీరుడు రాజమౌళి. ‘బాహుబలి 2’తో రాజమౌళికి ఏర్పడిన ఇమేజ్ ఆర్ఆర్ఆర్ పై అంచనాలు ఏర్పడ్డానికి పనికొచ్చింది. ఆ తరవాత రాజమౌళి, ఎన్టీఆర్, రామ్ చరణ్ స్వయంగా జపాన్ వెళ్లి ప్రచారం చేయడంతో సినిమాపై క్రేజ్ రెట్టింపు అయ్యింది.





Untitled Document
Advertisements