రూ.15,000తో రూ.4 కోట్లు...ఎలా? ఎందులో ఇన్వెస్ట్ చేస్తే?

Written by : smtv Desk | Mon, Oct 21, 2019, 09:07 PM

ఇన్వెస్ట్‌మెంట్స్ ద్వారా డబ్బులు రావాలి అంటే సరైన నిర్ణయాలతో పాటు సహనం కలిగి ఉండాలి. మ్యూచువల్ ఫండ్ ఇన్వెస్ట్‌మెంట్లు మార్కెట్ రిస్క్‌కు లోబడి ఇది అందరికి తెలిసిన సంగతే. అయితే దీర్ఘకాల లక్ష్యంతో చూస్తే ఈ రిస్క్ తగ్గిపోతుంది.ఎవరైనా మ్యూచువల్ ఫండ్స్‌లో చిన్న మొత్తంలో ఇన్వెస్ట్ చేస్తూ వస్తే కొంత కాలం తర్వాత అధిక రాబడిని పొందొచ్చు. ట్యాక్స్ అండ్ ఇన్వెస్ట్‌మెంట్ నిపుణుల ప్రకారం చూస్తే.. లాంగ్ టర్మ్ మ్యూచువల్ ఫండ్స్ కనీసం 12 శాతం రాబడి అందిస్తున్నాయి. కొన్ని సందర్భాల్లో రాబడి 16 శాతంగా కూడా ఉండొచ్చు. ముంబైకి చెందిన ట్యాక్స్ అండ్ ఇన్వెస్ట్‌మెంట్ ఎక్స్‌పర్ట్ సౌరబ్ కుమార్ మాట్లాడుతూ.. ‘25 ఏళ్లలో రూ.4 కోట్ల లక్ష్యాన్ని చేరుకోవాలంటే నెలకు రూ.25,000 ఇన్వెస్ట్ చేస్తూ రావాలి. అదే 27 ఏళ్లు అనుకుంటే అప్పుడు నెలకు రూ.20,000 ఇన్వెస్ట్ చేయాలి. నేను మాత్రం నెలకు రూ.15,000 ఇన్వెస్ట్ చేయాలని సూచిస్తా. తర్వాత మెల్లగా ఈ మొత్తాన్ని పెంచుకుంటూ వెళ్లాలి. దీంతో రూ.4 కోట్ల లక్ష్యానికి దగ్గరకు చేరొచ్చు’ అని వివరించారు. మ్యూచువల్ ఫండ్స్‌ను ట్రాక్ చేయడానికి ఇష్టపడని వారు లో కాస్ట్ ఫండ్స్‌కు ప్రాధాన్యమివ్వొచ్చని ఆయన తెలిపారు. ఐసీఐసీఐ ప్రుడెన్షియల్ నిఫ్టీ నెక్ట్స్ 50 ఇండెక్స్, యాక్సిస్ నిఫ్టీ 100, డీఎస్‌పీ క్వాంట్, మోతీలాల్ ఓస్వాల్ నిఫ్టీ 500 వంటి ఫండ్స్ వైపు మొగ్గుచూపొచ్చని సూచించారు. ఆదాయానికి అనుగుణంగా ఇన్వెస్ట్‌మెంట్లను కూడా పెంచుకుంటూ వెళ్లాలి. దీంతో మ్యూచువల్ ఫండ్స్‌లో కాంపౌండింగ్ ప్రయోజనం లభిస్తుంది. అలాగే ఇన్వెస్ట్‌మెంట్ మొత్తం కూడా పెరుగుతుంది. దీంతో అధిక రాబడి పొందొచ్చు’ అని ట్రాన్సెండ్ కన్సల్టెంట్స్ వెల్త్ మేనేజ్‌మెంట్ మేనేజర్ కార్తీక్ ఝవేరి తెలిపారు.