కరోనా కోసం 2 కొత్త ఇన్సూరెన్స్ పాలసీలు...జూలై 10 నుంచి అందుబాటులోకి

ఇన్సూరెన్స్ పాలసీల గురించి ప్రత్యేకంగా చెప్పాల్సిన అవసరం లేదు. టర్మ్ ఇన్సూరెన్స్, హెల్త్ ఇన్సూరెన్స్, వెహికల్ ఇన్సూరెన్స్ ఇలా ఎన్నో రకాల పాలసీలు మార్కెట్‌లో అందుబాటులో ఉన్నాయి. వీటిల్లో హెల్త్ పాలసీ తీసుకోవాలని భావించే వారికి తీపికబురు అందబోతోంది. సంవత్సరానికి కాకుండా ఇంకా తక్కువ కాలానికే ఇప్పుడు పాలసీలు అందుబాటులోకి రాబోతున్నాయి.

ఇన్సూరెన్స్ రెగ్యులేటర్ ఐఆర్‌డీఏఐ ఇప్పటికే ఇన్సూరెన్స్ కంపెనీలకు షార్ట్ టర్మ్ హెల్త్ ఇన్సూరెన్స్ పాలసీలకు సంబంధించి ఆదేశాలు జారీ చేసింది. కరోనా వైరస్ నేపథ్యంలో ఐఆర్‌డీఏఐ ఈ మేరకు నిర్ణయం తీసుకుంది. కరోనా వైరస్‌‌కు కవరేజ్ వర్తిస్తుంది. ఈ పాలసీలకు ఒకేసారి ప్రీమియం చెల్లించాల్సి ఉంటుంది. రెన్యూవల్ ఆప్షన్ ఉండదు. మళ్లీ కొత్తగా పాలసీ తీసుకోవాలి.


షార్ట్ టర్మ్ హెల్త్ ఇన్సూరెన్స్‌లో భాగంగా పాలసీల టర్మ్ 3 నెలల 15 రోజులు, 6 నెలలు 15 రోజులు, 9 నెలల 15 రోజులు.. ఇలా ఉంటుంది. అంటే ఇన్సూరెన్స్ కంపెనీలు కనీసం 3 నెలల కాల పరిమితితో పాలసీలను మార్కెట్‌లోకి తీసుకువస్తాయి. ప్రస్తుత పరిస్థితుల్లో షార్ట్ టర్మ్ హెల్త్ ఇన్సూరెన్స్ పాలసీల రూపకల్పన అనేది ఇన్సూరెన్స్ కంపెనీలకు బిగ్ డీల్ అని చెప్పొచ్చు. కాగా ఐఆర్‌డీఏఐ జూన్ 23న కోవిడ్ 19 హెల్త్ ఇన్సూరెన్స్ పాలసీలకు సంబంధించి నిబంధనలు జారీ చేసింది.


కరోనా షార్ట్ టర్మ్ హెల్త్ ఇన్సూరెన్స్ పాలసీలు కరోనా కవచ్ పాలసీ, కరోనా రక్షక్ పాలసీ పేర్లతో మార్కెట్‌లోకి రానున్నాయి. కరోనా కవచ్ పాలసీని రూ.50,000 నుంచి రూ.5 లక్షల వరకు బీమా మొత్తానికి తీసుకోవాలి. అదే కరోనా రక్షక్ పాలసీని రూ.50 వేల నుంచి రూ.2.5 లక్షల వరకు బీమా మొత్తానికి తీసుకోవచ్చు. జూలై 10లోపు ఈ పాలసీలు తీసుకురావాలని ఐఆర్‌డీఏఐ జనరల్, లైఫ్, హెల్త్ ఇన్సూరెన్స్ కంపెనీలను ఆదేశించింది.

ఐఆర్‌డీఏఐ కోవిడ్ 19 షార్ట్ టర్మ్ ఇన్సూరెన్స్ పాలసీల వల్ల కస్టమర్లకు కూడా ప్రయోజనం కలుగనుంది. వీటి కాల పరిమితి తక్కువగా ఉండటంతో పాలసీ ప్రీమియం కూడా స్వల్పంగా ఉంటుంది. దీంతో తక్కువ ప్రీమియం కారణంగా ఎక్కువ మంది పాలసీలు తీసుకునే ఛాన్స్ ఉంది. వీరందరికీ ఇన్సూరెన్స్ కవరేజ్ లభిస్తుంది. అనుకోని పరిస్థితుల్లో వీరికి పాలసీ ఆర్థికంగా బాసటగా నిలుస్తుంది.