సులభంగా గోల్డ్ లోన్...బంగారానికి అధిక రుణం!

Written by : smtv Desk | Wed, Aug 12, 2020, 05:26 PM

కరోనా వైరస్ కారణంగా ఆర్థిక ఇబ్బందులు ఎదుర్కొంటున్నారా? దీంతో ఇంట్లో ఉన్న బంగారాన్ని బ్యాంక్‌లో పెట్టి లోన్ తీసుకోవాలని భావిస్తున్నారా? అయితే మీకు శుభవార్త. బ్యాంకులు ఇప్పుడు తక్కువ వడ్డీకే గోల్డ్ లోన్స్ అందిస్తున్నాయి.

అంతేకాకుండా ఇప్పుడు గోల్డ్ లోన్ తీసుకునే వారికి గతంలో కన్నా ఎక్కువ మొత్తం రుణం కింద లభిస్తోంది. ఇప్పుడు మీరు బ్యాంకులో పెట్టే బంగారం విలువలో 90 శాతం మొత్తాన్ని పొందొచ్చు. తీసుకున్న రుణాన్ని నిర్ణీత కాలంలోగా తిరిగి చెల్లించాల్సి ఉంటుంది. బ్యాంక్ ప్రాతిపదికన గోల్డ్ లోన్ టెన్యూర్ కూడా మారుతుంది.

అన్ని బ్యాంకుల కన్నా దేశీ అతిపెద్ద బ్యాంక్ స్టేట్ బ్యాంక్ ఆఫ్ ఇండియా (SBI) చౌక వడ్డీకే రుణాలు అందిస్తోంది. ఎస్‌బీఐలో గోల్డ్ లోన్‌పై వడ్డీ రేటు 7 శాతం నుంచి ప్రారంభమౌతోంది. పంజాబ్ నేషనల్ బ్యాంక్ (PNB)లో గోల్డ్ లోన్‌పై వడ్డీ రేటు 8.6 శాతంగా ఉంది. ఇక దిగ్గజ ప్రైవేట్ రంగ బ్యాంక్ హెచ్‌డీఎఫ్‌సీలో గోల్డ్ లోన్ తీసుకుంటే 9.9 శాతం వడ్డీ చెల్లించాలి.

అలాగే మరో ప్రైవేట్ రంగ ప్రముఖ బ్యాంక్ ఐసీఐసీఐ బ్యాంక్‌లో గోల్డ్ లోన్స్‌పై వడ్డీ రేటు 10 శాతం నుంచి ప్రారంభమౌతోంది. కెనరా బ్యాంక్‌లో వడ్డీ రేటు 7.65 శాతం నుంచి ఆరంభమౌతోంది. యాక్సిస్ బ్యాంక్‌లో 9.75 శాతం నుంచి గోల్డ్ లోన్ పొందొచ్చు. ఇక ముత్తూట్ ఫైనాన్స్‌లో అయితే గోల్డ్ లోన్ వడ్డీ రేటు 12 శాతం నుంచి ప్రారంభమౌతోంది. లోన్ తీసుకోవడానికి పాన్ కార్డ్, ఆధార్ కార్డ్, ఓటర్ కార్డ్ వంటి డాక్యుమెంట్లు అవసరం అవుతాయి.