"ఎన్నడూ చూడని 4 ఘటనలను ఈ మ్యాచ్‌లోనే చూశా"

Written by : smtv Desk | Tue, Sep 22, 2020, 11:38 AM

ఐపీఎల్ మూడో మ్యాచ్‌లో ఫేవరేట్స్‌గా బరిలో దిగిన సన్‌రైజర్స్ హైదరాబాద్ అనూహ్యంగా ఓడింది. ఈ మ్యాచ్‌లో ఆరెంజ్ ఆర్మీని బ్యాడ్ లక్ వెంటాడింది. మిచెల్ మార్ష్ గాయపడటం, వార్నర్ అనూహ్య రీతిలో రనౌట్ కావడం మ్యాచ్ ఫలితాన్ని ప్రభావితం చేసింది. మ్యాచ్ అనంతరం వార్నర్ మాట్లాడుతూ.. గతంలో తాను ఇలా ఔటైన సంఘటన గుర్తుకు రావడం లేదన్నాడు. గతంలో తాను ఎన్నడూ చూడని నాలుగు ఘటనలు ఈ మ్యాచ్‌లో చోటు చేసుకున్నాయని వార్నర్ చెప్పుకొచ్చాడు.

ఒకటి తన రనౌట్, రెండోది మార్షల్ చూపిన తెగువ, మూడోది చాహల్ మ్యాచ్‌ను టర్న్ చేయడం, నాలుగోది కొత్త కుర్రాడు దేవదత్ పడిక్కల్ బ్యాటింగ్. యాంకిల్ ఇంజ్యూరీతో ఇబ్బంది పడిన మిచెల్ మార్ష్.. బ్యాటింగ్‌కు దిగేందుకు తెగువ ప్రదర్శించాడని వార్నర్ కొనియాడాడు. పాదం మీద బరువు మోపలేకపోయినా.. జట్టు కష్టాల్లో ఉన్నప్పుడు బ్యాటింగ్‌కు వచ్చాడన్నాడు. మార్ష్‌కు నొప్పి ఎక్కువగా ఉందని.. త్వరలోనే కోలుకుంటాడని వార్నర్ చెప్పాడు.

చివర్లో బెంగళూరు బౌలర్లపై ఎదురు దాడికి దిగాలని తమకు తెలుసన్న వార్నర్.. చాహల్ చివరి ఓవర్ మ్యాచ్‌ను మలుపు తిప్పిందన్నాడు. ఈ రోజు జరిగిన తప్పిదాలను తర్వాతి మ్యాచ్‌ల్లో పునరావృత్తం కాకుండా చూస్తామన్నారు. భారత్ యువ ఆటగాళ్లను తయారు చేస్తున్న తీరు అద్భుతంగా ఉందంటూ ఈ మ్యాచ్‌లో పడిక్కల్ రాణించిన విషయాన్ని వార్నర్ ప్రస్తావించాడు.

బెంగళూరు జట్టుపై వార్నర్‌కు అమోఘమైన బ్యాటింగ్ రికార్డ్ ఉంది. ఈ మ్యాచ్‌కు ముందు 9 మ్యాచ్‌ల్లో ఆర్సీబీపై ఆడిన వార్నర్.. ఏడు హాఫ్ సెంచరీలు, ఒక సెంచరీతో సత్తా చాటాడు. కానీ సోమవారం (సెప్టెంబర్ 21) నాటి మ్యాచ్ దురదృష్టవశాత్తూ రనౌట్ రూపంలో వెనుదిరిగాడు.