విజృంభిస్తోన్న బర్డ్ ఫ్లూ!!!

ఉత్తరాది రాష్ట్రాలు సహా కేరళలో బర్డ్ ఫ్లూ‌తో వేలాది పక్షులు మృత్యువాతపడుతున్నాయి. ఓవైపు కరోనా మహమ్మారి.. మరోవైపు బర్డ్ ఫ్లూ వ్యాప్తి చెందడంతో రాష్ట్ర ప్రభుత్వాలను కేంద్రం అప్రమత్తం చేసింది. దీనిని నివారించడానికి ముందు జాగ్రత్తలు తీసుకోవాలని పర్యావరణ, అటవీ, వాతావరణ మార్పుల మంత్రిత్వశాఖ మంగళవారం కీలక సూచనలు చేసింది. బర్డ్ ఫ్లూ వ్యాప్తిని నివారించడానికి రాష్ట్రాలు, కేంద్రపాలిత ప్రాంతాలు కార్యాచరణను రూపొందించుకోవాలని పేర్కొంది.

బర్డ్ ఫ్లూతో పలు రాష్ట్రాల్లో పక్షులు, వలస పక్షులు చనిపోతున్నాయని, దీన్ని నిరోధించడానికి చర్యలు తీసుకోవాలని రాష్ట్రాలు, కేంద్రపాలిత ప్రాంతాలకు కేంద్ర పర్యావరణ శాఖ లేఖలు రాసింది. జైపూర్‌లో అనారోగ్యానికి గురయిన కాకి నుంచి అటవీశాఖ అధికారులు నమూనాలను సేకరించి పరీక్షించగా.. బర్డ్ ఫ్లూ సోకినట్టు నిర్ధారణ అయ్యింది. ఈ వైరస్ సోకిన పక్షులలో వణుకు, విరేచనాలు, తల వంపు, పక్షవాతం లక్షణాలు కనిపిస్తాయి.

వలస పక్షులకు బర్డ్ ఫ్లూ సోకకుండా రాష్ట్ర స్థాయిలో పర్యవేక్షణ కమిటీని ఏర్పాటు చేయాలని కేంద్ర పర్యావరణ శాఖ కోరింది. ఈ వైరస్ పౌల్ట్రీరంగానికి సోకకుండా ముందస్తు జాగ్రత్తలు తీసుకోవాలని సూచించింది. ఏ కారణంగానైనా వలస పక్షుల మృతి చెందితే తమకు నివేదించాలని రాష్ట్రాలను ఆదేశించింది. ప్రతివారం నివేదికలను సమర్పించాలని స్పష్టం చేసింది.

బర్డ్ ఫ్లూ నేపథ్యంలో జంతు ప్రదర్శనశాలల్లో నిఘా పెంచాలని పేర్కొంది. జంతువులు, పక్షులను పట్టుకునేటపుడు రక్షణ కవచాలు ధరించాలని, సబ్బుతో చేతులను శుభ్రం చేసుకోవాలని ప్రజలకు కేంద్రం సూచించింది. పెంపుడు జంతువులను పట్టుకునేటపుడు రక్షిత కళ్లజోడు ధరించాలని, వాటిని చేత్తో పట్టుకొని తినడం, మంచినీళ్లు, పొగ తాగడం మానుకోవాలని కోరింది.

రాజస్థాన్, మధ్యప్రదేశ్, హిమాచల్‌ ప్రదేశ్, కేరళలో భారీగా పక్షులు చనిపోవడంతో దీనికి కారణాలపై ఆరా తీయగా.. వాటికి బర్డ్ ఫ్లూ సోకినట్టు నిర్ధారణ అయ్యింది. బర్డ్ ఫ్లూని వైద్య పరిభాషలో ఏవియన్ ఇన్‌ఫ్లూయేంజా అంటారు. ఇది పక్షులలో సంక్రమించే హెచ్5ఎన్1 రకం వైరస్.. అయినప్పటికీ, మానవులకు హాని కలిగిస్తుంది. వ్యాధి సోకిన వ్యక్తిలో ఫ్లూ లాంటి లక్షణాలు ఉంటాయి.

బర్డ్ ఫ్లూ లక్షణాలు ఇన్‌ఫ్లూయేంజా మాదిరిగానే ఉంటాయి. గొంతు నొప్పి.. దగ్గు, జ్వరం, అతిసారం, తలనొప్పి, శ్వాస తీసుకోవడంలో ఇబ్బంది, వికారం.. వాంతులతోపాటు ఇతర లక్షణాలు లేకుండా కేవలం కంటికి కూడా సంక్రమించవచ్చు.