ఉద్యోగులకి అలర్ట్‌...

Written by : smtv Desk | Fri, Jun 24, 2022, 12:46 PM

మీరు ప్రైవేట్ ఉద్యోగం చేస్తే ఈ విషయం కచ్చితంగా తెలుసుకోవాల్సిందే. జూలై 1 నుంచి కొత్త వేతన చట్టం నియమావళిని అమలు చేసేందుకు ప్రభుత్వం సన్నాహాలు చేస్తోంది. దీనివల్ల ప్రైవేట్‌ రంగ ఉద్యోగులపై తీవ్ర ప్రభావం పడనుంది.. కొత్త వేతన నియమావళి అమలులోకి వచ్చిన తర్వాత ఉద్యోగుల టేక్‌ హోమ్‌ సాలరీ తగ్గుతుంది. కానీ పీఎఫ్‌ ప్రయోజనం పెరుగుతుంది. కొత్త లేబర్ కోడ్ వల్ల ప్రయోజనాలు, అప్రయోజనాలు రెండూ ఉంటాయి.
ఉద్యోగి బేసిక్‌ వేతనం 30 నుంచి 40 శాతం వరకు ఉంటుంది. ఇది కాకుండా పెన్షన్ అలవెన్స్, హెచ్ అర్ ఏ , పి ఎఫ్.. మొదలైనవి ఉంటాయి. వీటి ఆధారంగా మీ జీతం నుంచి పీఎఫ్‌ కట్‌ అవుతుంది. కానీ ఇప్పుడు కొత్త నిర్మాణం ప్రకారం బేసిక్‌ వేతనం 50 శాతం ఉండాలి. ఇది మీ పీఎఫ్‌, గ్రాట్యుటీపై ప్రత్యక్ష ప్రభావాన్ని చూపుతుంది. కొత్త వేతన కోడ్ ప్రకారం వారానికి 48 గంటలు పనిచేయడం తప్పనిసరి. మీరు ప్రతిరోజూ 12-12 గంటలు పని చేస్తే మీకు 3 రోజుల సెలవు ఇచ్చే నిబంధన ఉంది.
కొత్త రూల్‌ని ఇలా అర్థం చేసుకోండి. ఉదాహరణకు మీ జీతం 50 వేలు అయితే మీ బేసిక్ ఇప్పుడు 15 వేల రూపాయలు అవుతుంది. దీని ప్రకారం మీ పీఎఫ్‌ నెలకు రూ. 1800 కట్‌ అవుతుంది (బేసిక్‌లో 12%). కానీ కొత్త రూల్ ప్రకారం 50 వేల సీటీసీపై మీ బేసిక్ 15 వేల నుంచి 25 వేల రూపాయలకు పెరుగుతుంది. దీనిపై మీ పీఎఫ్‌ సహకారం 12 శాతం మేర రూ. 3000కి పెరుగుతుంది. అంటే మీరు ముందు కంటే నెలకు రూ. 1200 తక్కువ పొందుతారు.