బెంగళూరు, ఏప్రిల్ 17: ఇటీవలి కాలంలో పెళ్లి పత్రికలు వినూత్నతను సంతరించుకుంటున్నాయి. ఆ తరహాలోనే ఓటర్ ఐడీ కార్డు మాదిరిగా తయారైన ఓ శుభలేఖ ఇప్పుడు సామాజిక మాధ్యమాల్లో వైరల్ అవుతోంది. ఓటు హక్కుపై ప్రజల్లో చైతన్యం తేవాలన్న ఆలోచనతోనే ఇలా ఎన్నికల గుర్తింపు కార్డులా శుభలేఖను ప్రచురించామని వధూవరులు చెబుతున్నారు.
కర్ణాటకలోని ధార్వాడలో బెస్కాం అధికారిగా విధులు నిర్వర్తిస్తున్న మంజునాథ్ కుమారుడు సునీల్ కు, హెస్కాంలో ఇంజనీర్ గా పని చేస్తున్న మహేశ్ అనే యువకుడి సోదరి అన్నపూర్ణలకు ఈనెల 26న వివాహం నిశ్చయించారు. ప్రస్తుతం లోక్ సభ ఎన్నికలు జరుగుతుండటంతో ఓటు ఆవశక్యతను తమ పెళ్లికి వచ్చే బంధు మిత్రులకు తెలియజేయాలన్న ఉద్దేశంతో, వీరు తమ శుభలేఖను వినూత్నంగా తీర్చిదిద్దారు. ఈ కార్డును మీరూ చూడవచ్చు.