ఆర్టీసీ ఛార్జీలు పెంపు...ఏ బస్సుకు ఎంత?!

Written by : smtv Desk | Tue, Dec 10, 2019, 05:02 PM

ఆంధ్రప్రదేశ్ లో ఆర్టీసీ ఛార్జీలను పెంచిన సంగతి తెలిసిందే... తాజాగా ఏపీఎస్ ఆర్టీసీ మరో కీలక నిర్ణయం తీసుకుంది. పెంచిన ఛార్జీలను బుధవారం (11-12-2019) నుంచి అమలు చేయనున్నారు. పల్లె వెలుగులో కి.మీకు 10 పైసలు.. ఎక్స్‌ప్రెస్, అల్ట్రా డీలక్స్, సూపర్ లగ్జరీలో కి.మీకు 20 పైసలు.. ఇంద్ర ఏసీ, గరుడ, అమరావతి బస్సుల్లో కి.మీకు 10 పైసలు ఛార్జీలు పెరిగాయి. వెన్నెల స్లీపర్ బస్సుల్లో ఛార్జీలు యధాతథంగా ఉంటాయి.. సిటీ ఆర్డినరీ బస్సుల్లో 11 స్టేజీల వరకు ఛార్జీల పెంపు లేదు. పల్లె వెలుగులో మొదటి 2 స్టేజీలు, 10 కి.మీ వరకు ఛార్జీలు పెంచలేదు. ఏపీఎస్ ఆర్టీసీ నష్టాల్లో కూరుకుపోయిందని.. సంస్థను గట్టెక్కించాల్సిన అవసరం ఉందని.. అందుకే ఛార్జీలు పెంచాల్సి వస్తోందని రవాణాశాఖ మంత్రి పేర్ని నాని అన్నారు. ఇప్పటికే ఏపీఎస్ ఆర్టీసీకి రూ.6735 కోట్ల అప్పులున్నాయని.. ఏటా ఆర్టీసీకి రూ.1200 కోట్ల నష్టాలు వస్తున్నాయని.. నష్టాల్లో ఉన్న సంస్థను కాపాడేందుకే చార్జీల పెంపు నిర్ణయం తీసుకున్నట్లు తెలిపారు. తెలంగాణలో ఆర్టీసీ చార్జీలు పెంచిన విషయం తెలిసిందే.. ఇప్పుడు ఏపీలో కూడా ఛార్జీలు పెరిగాయి. అసెంబ్లీ సమావేశాలు జరుగుతున్న సమయంలోనే పెంచిన ఛార్జీలు అమలవు కావడం ఆసక్తికరంగా మారింది. ఈ అంశంపై ప్రతిపక్షం టీడీపీ అసెంబ్లీలో ప్రస్తావించే అవకాశం ఉంది.. దీనిపై ప్రభుత్వం ఎలాంటి క్లారిటీ ఇస్తుందన్నది చూడాలి. ఏపీఎస్ ఆర్టీసీకి ఏటా రూ.వెయ్యి కోట్లకు పైగా నష్టాలు వస్తున్నా.. నాలుగేళ్లుగా చార్జీలు పెంచలేదని.. భారీ నష్టాలు, పెరుగుతున్న డీజిల్‌ ధరల నేపథ్యంలో చార్జీలు పెంచాలని ఆర్టీసీ ఎప్పటి నుంచో కోరుతోంది.