స్మార్ట్ టీవీని లాంచ్ చేసిన అమెజాన్!

ప్రస్తుతం దేశంలో బడ్జెట్ టీవీల రంగంలో షియోమీ దూసుకుపోతూ ఉండగా, మోటొరోలా కూడా ఈ మధ్యే ఈ రంగంలోకి ఎంట్రీ ఇచ్చింది. అయితే ఈ రంగంలోకి ఇప్పుడు తాజాగా అమెజాన్ కూడా అడుగు పెట్టింది. ఒనిడా భాగస్వామ్యంతో 43 అంగుళాలు, 32 అంగుళాలు ఉన్న రెండు స్మార్ట్ టీవీలను అమెజాన్ లాంచ్ చేసింది. ఈ స్మార్ట్ టీవీలకు ఒనిడా ఫైర్ టీవీ ఎడిషన్ అని పేరు పెట్టారు. 32 అంగుళాల ఒనిడా ఫైర్ టీవీ ఎడిషన్ ధర రూ.12,999గా నిర్ణయించారు. 43 అంగుళాల టీవీ ధర రూ.21,999గా ఉంది. వీటికి సంబంధించిన సేల్ అమెజాన్ లో డిసెంబర్ 20 నుంచి ప్రారంభం కానుంది.

​32 అంగుళాల టీవీ ఫీచర్లు ఇవే!

ఈ టీవీలో 32 అంగుళాల హెచ్ డీ రెడీ ఎల్ఈడీ స్క్రీన్ ను అందించారు. సాధారణంగా రూ.12,999 శ్రేణిలో ఉండే స్మార్ట్ టీవీల్లో అమెజాన్ ప్రైమ్, నెట్ ఫ్లిక్స్ వంటి వాటికి సపోర్ట్ ఉండదు. కానీ ఇందులో ఈ రెండిటితో పాటు హాట్ స్టార్, యూట్యూబ్ వంటి యాప్స్ ను కూడా యాక్సెస్ చేయవచ్చు. ఈ టీవీలకు ఉండే అతి పెద్ద ప్లస్ పాయింట్ ఇదే. ఈ టీవీ ఆండ్రాయిడ్ ఆపరేటింగ్ సిస్టంపై కాకుండా ఫైర్ టీవీ సాఫ్ట్ వేర్ పై పనిచేస్తుంది. నేరుగా వైఫైకి కనెక్ట్ చేసుకోవడం ద్వారా ఇందులో కంటెంట్ ను స్ట్రీమ్ చేయవచ్చు.

కనెక్టివిటీ విషయానికి వస్తే.. ఈ టీవీతో పాటు అలెక్సా వాయిస్ రిమోట్ ను అందించనున్నారు. అంటే మన వాయిస్ ద్వారా ఈ రిమోట్ ని యాక్సెస్ చేయవచ్చన్న మాట. ఈ టీవీలో మూడు హెచ్ డీఎంఐ పోర్టులు, ఒక యూఎస్ బీ పోర్ట్, ఇథర్ నెట్ పోర్ట్ ఒకటి అందించారు.

​43 అంగుళాల టీవీ ఫీచర్లు ఇవే!

ఇక 43 అంగుళాల టీవీ విషయానికి వస్తే.. ఇందులో ఫుల్ హెచ్ డీ రెడీ ఎల్ఈడీ స్క్రీన్ ను అందించారు. మిగతా ఫీచర్ల విషయానికి వస్తే.. పై టీవీ తరహాలోనే ఇందులో కూడా అమెజాన్ ప్రైమ్, నెట్ ఫ్లిక్స్, హాట్ స్టార్, యూట్యూబ్ యాప్స్ కు యాక్సెస్ ఉంది. ఇక కనెక్టివిటీ ఫీచర్లు కూడా పై టీవీ తరహాలోనే అందించారు. ఫీచర్ల విషయంలో రెండిటికీ పెద్దగా తేడాలు లేవు. ప్రధాన తేడా స్క్రీన్ సైజ్ మాత్రమే.

​వినియోగదారులకు కచ్చితంగా నచ్చుతుంది: అమెజాన్

ఈ టీవీ తమ వినియోగదారులకు కచ్చితంగా నచ్చుతుందని అమెజాన్ పేర్కొంది. ఒనిడా కంపెనీతో కలిసి భారత మార్కెట్లోకి టీవీలను తీసుకురావడం ఎంతో ఉత్సాహాన్ని ఇస్తుందని ఆ సంస్థ ప్రతినిధులు తెలిపారు. ఫైర్ టీవీలో అద్భుతమైన పిక్చర్ క్వాలిటీ, దానిని మ్యాచ్ చేసే సౌండ్ క్వాలిటీలను అందిస్తున్నట్లు తెలిపారు.అలాగే అమెజాన్ తో కలిసి పని చేయడం కూడా తమకు ఎన్నో ఉత్సాహాన్ని ఇస్తోందని ఒనిడా ప్రతినిధులు పేర్కొన్నారు. భారతదేశంలో టీవీలను తయారు చేయడంలో తమకు 38 సంవత్సరాల అనుభవం ఉందని, ఇక్కడి వినియోగదారులు ఏం కోరుకుంటున్నారో తమకు తెలుసన్నారు. తక్కువ ధరలో అత్యంత నాణ్యత ఉన్న టీవీలను తయారు చేశామని చెప్పారు.