పీఎఫ్ తగ్గించుకొని.. జీతం పెంచుకుంటే.. రూ.లక్షల్లో నష్టం!

ఖర్చులు పెరిగిపోతూనే వస్తున్నాయి. దీంతో ప్రతి ఒక్కరూ ఇంటికి తీసుకెళ్లే జీతం ఎక్కువగా ఉంటే బాగుంటుందని భావిస్తారు. అయితే మీకు శుభవార్త. కేంద్ర ప్రభుత్వం మీకు ఒక ఆప్షన్ అందుబాటులోకి తీసుకురాబోతోంది. పీఎఫ్ కటింగ్స్ తగ్గించుకొని ఇంటికి పట్టుకెళ్లే వేతనాన్ని పెంచుకోవచ్చు. మోదీ సర్కార్ సామాజిక భద్రత కోడ్ బిల్లు 2019 రూపంలో ఈ వెసులుబాటులను ఉద్యోగులకు అందుబాటులోకి తీసుకురావాలని భావిస్తోంది. ఈ వారంలోనే ఈ బిల్లుకు పార్లమెంట్‌లో ఆమోదం లభించే అవకాశం ఉంది. కేంద్ర కేబినెట్ ఇప్పటికే దీనికి గ్రీన్ సిగ్నల్ ఇచ్చింది. కంపెనీల పీఎఫ్ కంట్రిబ్యూషన్ మాత్రం 12 శాతంగానే ఉంటుంది. అయితే కేవలం ఉద్యోగుల వేతనం నుంచి కట్ అయ్యే పీఎఫ్ కంట్రిబ్యూషన్‌ను తగ్గించాలని కేంద్రం భావిస్తోంది. ఉద్యోగి బేసిక్ వేతనం నుంచి 12 శాతం ఈపీఎఫ్ అకౌంట్‌‌లో జమ అవుతుందనే విషయం అందరికీ తెలిసిందే. చేతికి ఎక్కువ వేతనం రావడం మంచి విషయమే. బయట ధరలు పెరుగుతున్నట్లుగా జీతం పెరగదు. ఇప్పుడు ఇంటికి ఎక్కువ వేతనం తీసుకెళ్లడం మంచిదే కావొచ్చు.. మరి రేపటి సంగతేంటి? ఈపీఎఫ్‌ను రిటైర్మెంట్ ఇన్వెస్ట్మెంట్ సాధనంగా భావిస్తారు. ఉద్యోగుల చేతికి ఎక్కువ జీతం రావడం వల్ల వ్యవస్థలో డిమాండ్ పుంజుకోచ్చని కేంద్రం భావిస్తూ ఉండొచ్చు. అయితే ఇన్వెస్ట్‌మెంట్ నిపుణులు, ఆర్థిక సలహాదారులు మాత్రం దీన్ని స్వల్పకాలిక సొల్యూషన్‌గా భావిస్తున్నారు. దేశంలో చాలా మంది రిటైర్మెంట్ కోసం ఈపీఎఫ్ అకౌంట్‌లో డబ్బులు దాచుకుంటూ వస్తున్నారు. ఇప్పుడు ఈపీఎఫ్ కంట్రిబ్యూషన్ తగ్గితే పదవీ విరమణ తర్వాత పొందే డబ్బు తగ్గిపోతుంది. అప్పుడు ఇబ్బందులు పడాల్సి రావొచ్చు. వయసు ఉన్నప్పుడే డబ్బు సంపాదించలేక సేవింగ్స్‌ను తగ్గించుకుంటే.. పదవీ విరమణ తర్వాత కష్టాలు మరింత ఎక్కువయ్యే అవకాశం ఉంటుంది. అసెట్ మేనేజర్స్ మేనేజింగ్ పార్ట్‌నర్ సూర్య భాటియా మాట్లాడుతూ.. ఇది మంచి నిర్ణయం అని తాను అనుకోవడం లేదన్నారు. ఈపీఎఫ్ అనేది సురక్షితమైన పన్ను ప్రయోజనాలు ఉన్న సేవింగ్స్ సాధనమని తెలిపారు. తక్కువ ఈపీఎఫ్ కంట్రిబ్యూషన్ వల్ల చేతికి వచ్చే జీతం పెరుగుతుందన్నారు. దీంతో సేవింగ్స్ తగ్గి ఖర్చు చేయడం పెరుగుతుందని తెలిపారు. అందువల్ల ఇలాంటి ఆప్షన్ లేకపోవడం మంచిదని అభిప్రాయప్డారు. చాలా మంది ఆర్థిక సలహాదారులు ఉద్యోగం మారినప్పుడు కూడా పీఎఫ్ డబ్బులు విత్‌డ్రా చేసుకోవద్దని సలహా ఇస్తుంటారు. పీఎఫ్ డబ్బును ట్రాన్స్‌ఫర్ చేసుకోవాలని సూచిస్తారు. హోమ్ లోన్ రీపేమెంట్, పిల్లల చదువు, పెళ్లి వంటి పలు ఆప్షన్లకు పీఎఫ్ డబ్బులు తీసుకోవచ్చు. కానీ పీఎఫ్ డబ్బులను ఎప్పుడూ చివరి ఆప్షన్‌గా పెట్టుకోవాలి. పీఎఫ్ కంట్రిబ్యూషన్ తగ్గింపు అంశాన్ని కూడా ఇలానే చూడాలి. ఈపీఎఫ్ కంట్రిబ్యూషన్‌‌పై పన్ను ప్రయోజనాలు ఉన్న విషయం అందరికీ తెలిసిందే. సెక్షన్ 80సీ కింద ట్యాక్స్ బెనిఫిట్ లభిస్తుంది. ఇక్కడ మీరు పీఎఫ్ కంట్రిబ్యూషన్ తగ్గించుకుంటన్నారంటే.. అప్పుడు మీకు తక్కువ పన్ను ప్రయోజనాలు లభించినట్లే అవుతుంది. ఉదాహరణకు వార్షిక పీఎఫ్ కంట్రిబ్యూషన్ రూ.7,200 అనుకుంటే.. 31.2 శాతం ట్యాక్స్ స్లాబ్‌లో ఉన్న వ్యక్తికి రూ.2,250 ఆదా అవుతుంది. అలాగే ఈపీఎఫ్ కంట్రిబ్యూషన్ తగ్గిపోవడం వల్ల అకౌంట్‌లో జమ అయిన మొత్తం కూడా తగ్గుతుంది. ఉదాహరణకు 30 ఏళ్ల వయసు ఉన్న వారు 60 ఏళ్లలో రిటైర్ అవుతారని అనుకుంద్దాం. వీరి మంత్లీ బేసిక్ శాలరీ రూ.30,000. ఇప్పుడు కంట్రిబ్యూషన్‌ను 12 శాతం నుంచి 10 శాతానికి తగ్గిస్తే.. రిటైర్మెంట్ మొత్తం రూ.92 లక్షల నుంచి రూ.76 లక్షలకు తగ్గుతుంది. అంటే రూ.16 లక్షలు కోల్పోయినట్లే.