మరో అద్భుతమైన ఆఫర్ ను లాంచ్ చేసిన వొడాఫోన్

తక్కువ ధరలతో ఎక్కువ వ్యాలిడిటీని అందించడంలో ప్రముఖ టెలికం సంస్థ వొడాఫోన్ ఇప్పటికీ ముందంజలోనే ఉంది. టారిఫ్ ల పెంపునకు ముందు వొడాఫోన్ రూ.299కే 70 రోజుల వ్యాలిడిటీతో ఒక ప్లాన్ ను అందించేది. ఇప్పుడు ఆ ప్లాన్ కే కాస్త మార్పులు చేసి రూ.269 ప్లాన్ గా మళ్లీ తీసుకువచ్చింది. అయితే ఈ ప్లాన్ ప్రస్తుతానికి అన్ని సర్కిళ్లలో అందుబాటులో లేదు. అయితే ఈ ప్లాన్ అందుబాటులో ఉన్న సర్కిళ్లలో ఏపీ, తెలంగాణ కూడా ఉన్నాయి. వొడాఫోన్ అందించే రూ.269 ప్లాన్ వ్యాలిడిటీ 56 రోజులుగా ఉంది. ఇక ప్లాన్ లాభాల విషయానికి వస్తే.. మొత్తంగా 56 రోజుల కాలానికి 4 జీబీ డేటా అందించనున్నారు. అలాగే 600 ఎస్ఎంఎస్ లు కూడా అందిస్తారు. ఏ నెట్ వర్క్ కు అయినా అన్ లిమిటెడ్ ఫ్రీ కాలింగ్ చేసుకోవచ్చు. దీంతో పాటు వొడాఫోన్ ప్లే, జీ5 సబ్ స్క్రిప్షన్ కూడా ఉచితంగా లభించనున్నాయి. అయితే ఎయిర్ టెల్ థ్యాంక్స్ ప్లాటినం తరహాలో జీ5 సబ్ స్క్రిప్షన్ ప్రత్యేకంగా లభించదు. వొడాఫోన్ ప్లే యాప్ ద్వారానే వినియోగదారులు జీ5లో లభించే కంటెంట్ ను స్ట్రీమ్ చేయవచ్చు. 56 రోజుల వ్యాలిడిటీని అందించే ప్లాన్లలో వొడాఫోన్ అందించే అత్యంత చవకైన ప్లాన్ ఇదే. జియో, ఎయిర్ టెల్ ల్లో కూడా 56 రోజుల వ్యాలిడిటీని అందించే ప్లాన్లలో ఇంత చవకైన ప్లాన్ లేదు. అయితే జియో రూ.329కే ఏకంగా 84 రోజుల వ్యాలిడిటీని అందించే ప్లాన్ ను అందిస్తోంది. వొడాఫోన్, ఎయిర్ టెల్ ల్లో కూడా రూ.379 ప్లాన్ ద్వారా 84 రోజుల వ్యాలిడిటీని అందిస్తున్నారు. తక్కువ మొత్తంతో ఎక్కువ వ్యాలిడిటీని పొందాలంటే వొడాఫోన్ లో రూ.379 ప్లాన్ కూడా ఉంది. ఈ ప్లాన్ వ్యాలిడిటీ 84 రోజులుగా ఉంది. ఇక ఈ ప్లాన్ ద్వారా అందించే లాభాల విషయానికి వస్తే.. మొత్తంగా 6 జీబీ డేటాను అందించనున్నారు. ఏ నెట్ వర్క్ నుంచి ఏ నెట్ వర్క్ కు అయినా అన్ లిమిటెడ్ వాయిస్ కాలింగ్ చేసుకోవచ్చు. మొత్తంగా 1000 ఎస్ఎంఎస్ లు అందిస్తారు. వొడాఫోన్ ప్లే, జీ5లకు ఉచిత సబ్ స్క్రిప్షన్ లభిస్తుంది. ఎయిర్ టెల్ లో ఇదే లాభాలను అందించే రూ.379 ప్లాన్ అందుబాటులో ఉంది. కాకపోతే అక్కడ వొడాఫోన్ ప్లే, జీ5లకు బదులు వింక్ మ్యూజిక్, ఎయిర్ టెల్ ఎక్స్ ట్రీమ్ లకు ఉచిత సబ్ స్క్రిప్షన్ లభిస్తుంది. జియోలో కూడా రూ.329 ప్లాన్ తో దాదాపు ఇవే తరహా లాభాలను అందిస్తున్నారు. అయితే జియోలో అన్ లిమిటెడ్ కాలింగ్ ఆప్షన్ లేదు. జియోకు ఉచితంగా కాల్స్ చేసుకోవచ్చు కానీ వేరే నెట్ వర్క్ లకు కాల్స్ చేసుకోవాలంటే.. 3000 ఉచిత నిమిషాలను అందిస్తారు.