కరోనా ఎఫెక్ట్... బ్యాంక్ కస్టమర్లకు 2 కొత్త సర్వీసులు...

కరోనా వైరస్ వల్ల దేశం మొత్తం లాక్‌డౌన్‌లోకి వెళ్లిపోయింది. ప్రజలు కూడా తీవ్ర ఇబ్బందులు ఎదుర్కొంటున్నారు. వ్యాపారులు అయితే చితికిపోతున్నారు. దాదాపు అన్ని రంగాలపై ఎఫెక్ట్ పడుతోంది. బ్యాంకింగ్ రంగం కూడా ఇందుకు మినహాయింపేమీ కాదు. ఈ నేపథ్యంలో బ్యాంకులు తమ కస్టమర్లకు సాధ్యమైనంత వరకు మెరుగైన సేవలు అందించేందుకు ప్రయత్నిస్తున్నాయి. కోవిడ్ 19 వల్ల నెలకొన్ని ప్రస్తుత పరిస్థితుల్లో బ్యాంకులు వాటి వాటి కస్టమర్లకు పలు ప్రత్యేక సదుపాయాలు అందిస్తున్నాయి. కేంద్ర ఆర్థిక మంత్రి నిర్మలా సీతారామన్ ఇప్పటికే పలు కీలక నిర్ణయాలు ప్రకటించారు. ఏటీఎం విత్‌డ్రాయెల్స్‌పై ఎలాంటి చార్జీలు ఉండవని తెలిపారు. జూన్ 30 వరకు ఈ నిర్ణయం అమలులో ఉంటుంది. అంటే వచ్చే మూడు నెలల వరకు డెబిట్ కార్డు కలిగినవారు ఏ ఏటీఎం నుంచైనాసరే డబ్బులను ఎలాంటి చార్జీలు లేకుండా విత్‌డ్రా చేసుకోవచ్చు. ఎన్నిసర్లైనా మనీ విత్‌డ్రా చేయొచ్చు. ఎలాంటి పెనాల్టీలు ఉండవు. ఉదాహరణకు మీకు హెచ్‌డీఎఫ్‌సీ బ్యాంక్‌లో అకౌంట్ ఉంది. మీరు మీ డెబిట్ కార్డుతో ఎస్‌బీఐ, ఐసీఐసీఐ బ్యాంక్, యాక్సిస్ బ్యాంక్, పంజాబ్ నేషనల్ బ్యాంక్, బ్యాంక్ ఆఫ్ బరోడా ఇలా ఏ బ్యాంక్ ఏటీఎం నుంచైనా డబ్బులు విత్‌డ్రా చేసుకోవచ్చు. ఎలాంటి చార్జీలు పడవు. అయితే మీరు డబ్బులు అత్యవసరం అయితేనే ఏటీఎంకు వెళ్లి డబ్బులు తీసుకోండి. దేశంలో లాక్‌డౌన్ పరిస్థితులు ఉన్న విషయం తెలిసిందే. 21 రోజులు ఇంట్లో నుంచి బయటకు రాకుండా వైరస్ నుంచి తప్పించుకోండి. అంతేకాకుండా బ్యాంక్ కస్టమర్లకు మరో ఫెసిలిటీ కూడా అందుబాటులోకి వచ్చింది. సేవింగ్స్ బ్యాంక్ అకౌంట్‌లో మినిమమ్ బ్యాలెన్స్ కలిగి ఉండాల్సిన అవసరం లేదు. ఇది కూడా మూడు నెలలు అమలులో ఉంటుంది. స్టేట్ బ్యాంక్ మినహా మిగతా అన్ని బ్యాంకులు మినిమమ్ బ్యాలెన్స్ రూల్స్‌ను కలిగి ఉన్న విషయం తెలిసిందే. ఇప్పుడు ఏ బ్యాంక్‌లో అకౌంట్ ఉన్నా కూడా జూన్ 30 వరకు అకౌంట్‌లో మినిమమ్ బ్యాలెన్స్ కలిగి ఉండాల్సిన అవసరం లేదు. కాగా కరోనా వైరస శరవేగంగా విస్తరిస్తున్న విషయం తెలిసిందే. అంతర్జాతీయంగా కరోనా వల్ల ఇప్పటికే 21 వేల మందికి పైగా మరణించారు. అలాగే 3 లక్షల మందికి పైగా కరోనా వైరస్ సోకింది. మన దేశంలో కూడా కరోనా కేసులు 500కు పైగానే నమోదయ్యాయి. ఈ నేపథ్యంలో కేంద్రం కరోనా వ్యాప్తిని అరికట్టేందుకు అందుబాటులోని అన్ని చర్యలను తీసుకుంటోంది.