కరోనావైరస్ ముప్పు లేకుండా సురక్షితంగా ఉన్న ఏకైక ప్రదేశం

కరోనావైరస్ ప్రపంచ వ్యాప్తంగా దాదాపు అన్ని దేశాల్లో వ్యాపించింది. ఇప్పటికే ఈ వైరస్ సోకిన వారి సంఖ్య 8 లక్షలకు చేరువైంది. ఈ ఘోరమైన వైరస్ వ్యాప్తిని తగ్గించేందుకు చాలా దేశాల్లో లాక్ డౌన్ విధించగా, ఈ మహమ్మారి అనేక కోణాల్లో మానవుల జీవిత గమనాన్ని మారుస్తోంది. ఏదేమైనా ఈ సంక్షోభ సమయంలో ఆకస్త్మాత్తుగా ఏర్పడుతున్న భారీ మార్పుల ద్వారా ప్రభావితం కాని ప్రదేశం ఒకటి ఉంది. అంటార్కిటికా ఖండంలో ఇప్పటి వరకు ఒక్క కరోనావైరస్ కేసు కూడా నివేదించబడలేదు. ఇక్కడ ఉన్న కొద్ది మంది ప్రజలు మాత్రం ఈ వైరస్ నుండి దూరంగా ఉండగలిగారు. దీంతో ప్రపంచ వ్యాప్తంగా అందరి దృష్టి అంటార్కిటికా ఖండంపై పడింది. అయినప్పటికీ అంటార్కిటికాకు అధికారిక స్థానిక జనాభా లేనందున ఇక్కడ ఇంకా ఒక కేసు కూడా నమోదు కాకపోవడం ఆశ్చర్యకరం కాదు. అక్కడి నివసించే 4400 మందిలో మెజారిటీ ప్రజలు ఎక్కువగా పరిశోధకులు మరియు శాస్త్రవేత్తలు ఉన్నారు. అదే విధంగా సాధారణ సమయాల్లో కూడా అంటార్కిటికా నుండి బయటకు వెళ్లడానికి, లోపలికి రావడానికి కొద్ది మందికి మాత్రమే అనుమతి ఉంది. ఇక్కడికి ప్రవేశించే ముందు మెడికల్ వర్కర్లు ఫ్లూ వంటి అనారోగ్య సంకేతాలు ఉన్నాయో లేదో తెలుసుకునేందుకు స్క్రీనింగ్ చేసి పంపిస్తారు. ఈ రక్షణ చర్యలను ఇక్కడ ఎప్పుడూ కచ్చితంగా పాటిస్తూ ఉంటారు. దీని ప్రకారం అంటార్కిటికాలో ఉన్న వారికి ఈ వైరస్ సోకే అవకాశం దాదాపు లేదని చెప్పాలి. కానీ ఒక వేళ ఎవరైనా ఈ వైరస్ బారిన పడితే ఇది పెద్ద ప్రమాదాన్ని సృష్టించే అవకాశం ఉంది. ఇక్కడ చాలా స్థావరాల్లో తీవ్రమైన శ్వాసకోస సంక్రమణ కేసులను నిర్వహించే సామర్ధ్యం ఉన్నప్పటికీ వేగంగా విస్తరించే కరోనా వైరస్ వ్యాప్తిని మాత్రం నివారించడం అసాధ్యం. జనాభా కూడా తక్కువగా ఉండడంతో నష్టం స్పష్టంగా ఇక్కడ తెలుస్తుంది. అదే జరిగితే ఇంకా ఈ వైరస్ భూమి చివరలకు వ్యాపించదని హామీ ఇవ్వడానికి కూడా అవకాశం లేకుండా పోతుంది. కరోనా వైరస్ మహమ్మారి గురించి ఆస్ట్రేలియన్ అంటార్కిటిక్ లోని చీఫ్ మెడికల్ ఆఫీసర్ ప్రస్తావిస్తూ... అంటార్కిటికాతో సహా ఏ ఖండం కూడా ఈ వైరస్ నుండి తప్పించుకునే రోగ నిరోధక శక్తిని కలిగి ఉండదని అన్నారు. దీనిని రాకుండా నిరోధించేందుకు అన్ని రకాల ప్రయత్నాలు చేస్తున్నట్లు వివరించారు. బ్రిటన్ యొక్క రోథెరా పరిశోధనా స్థావరంలో స్టేషన్ లీడర్ మైక్ బ్రియాన్ మాట్లాడుతూ... ప్రాణాంతకమైన ఈ కరోనా వైరస్ ప్రపంచంలోని ఇతర ప్రాంతాలలో వేగంగా విస్తరిస్తున్నందున అంటార్కిటికా ప్రాంతంలో ఆరోగ్య సమస్యలు ఉన్న వారిపై ప్రత్యేక దృష్టి పెట్టినట్లు తెలిపారు. ప్రజల్లో కూడా ఆరోగ్య రక్షణపై అవగాహన పెరిగిందని, ఈ సమయంలో హ్యాండ్ శానిటైజర్ వాడకం కూడా ఎక్కువైనట్లు ఆయన పేర్కొన్నారు.