టిక్ టాక్ స్థానంలోకి వచ్చిన ఇండియన్ యాప్...చింగారీ!

Written by : smtv Desk | Tue, Jun 30, 2020, 03:45 PM

టిక్ టాక్ ప్రత్యామ్నాయంగా రూపొందిన భారతీయ యాప్ చింగారీకి ఒక్కసారిగా డిమాండ్ పెరిగింది. టిక్ టాక్ ను నిషేధించినట్లు ప్రకటన రావడంతో ఈ యాప్ ను వినియోగదారులు విపరీతంగా డౌన్ లోడ్ చేసుకుంటున్నారు. చింగారీ సహ వ్యవస్థాపకులు సుమిత్ ఘోష్ దీనికి సంబంధించిన వివరాలను విడుదల చేశారు. ప్రస్తుతం ప్రతి అరగంటకూ 10 లక్షల మంది డౌన్ లోడ్ చేసుకుంటున్నారు.
టిక్ టాక్ ను నిషేధించిన అనంతరం సుమిత్ ఘోష్ ఈ డేటాను ట్వీటర్ ద్వారా విడుదల చేశారు. ఒక్కసారిగా ఎక్కువమంది డౌన్ లోడ్ చేసుకోవడం యాప్ సర్వర్ కూడా క్రాష్ అయిందని ఆయన తెలిపారు. కానీ వెంటనే కొన్ని గంటల తర్వాత తిరిగి పనిచేసిందని పేర్కొన్నారు.

ఈ యాప్ రేటింగ్ కూడా గూగుల్ ప్లే స్టోర్ లో బాగానే ఉంది. 4.7 స్టార్ రేటింగ్ తో ఈ యాప్ ముందుకు దూసుకుపోతుంది. ఈ యాప్ ను బెంగళూరుకు చెందిన విశ్వాత్మ నాయక్, సిద్ధార్థ్ గౌతమ్ లు రూపొందించారు. గూగుల్ ప్లేస్టోర్ లో 2018 నవంబర్ లోనూ, యాపిల్ యాప్ స్టోర్ 2019 జనవరిలోనూ ఈ యాప్ లాంచ్ అయింది. ఈ యాప్ ను ఉచితంగా డౌన్ లోడ్ చేసుకోవచ్చు. దీని ఇంటర్ ఫేస్ కూడా టిక్ టాక్ తరహాలోనే ఉంటుంది.హిందీ, తెలుగు, తమిళం, కన్నడం, మలయాళం, బంగ్లా, గుజరాతీ, మరాఠీ, పంజాబీ వంటి భారతీయ భాషలను ఈ యాప్ సపటోర్్ చేస్తుంది. ఈ యాప్ ద్వారా వీడియోలు చేసిన వారికి వచ్చే వ్యూస్ ప్రకారం మొదట పాయింట్లు వస్తాయి. అనంతరం వాటిని నగదు కింద మార్చుకోవచ్చు.
టిక్ టాక్ సహా మొత్తం 59 చైనీస్ యాప్స్ ను భారత ప్రభుత్వం బ్యాన్ చేసింది. దేశ సార్వభౌమత్వాన్ని, వినియోగదారుల భద్రతను కాపాడటం కోసం ఈ నిర్ణయం తీసుకున్నట్లు ప్రభుత్వం ఈ సందర్భంగా తెలిపింది. టిక్ టాక్ కు పోటీగా రూపొందిన మిత్రోన్ యాప్ కూడా గూగుల్ ప్లే స్టోర్ లో కోటి డౌన్ లోడ్లను సొంతం చేసుకుంది. కానీ దాని చుట్టూ గతంలో వివాదాలు నెలకొన్నాయి.