రేగు పండ్లతో బీరు తయారీ...అదిరిపోయే లాభాలు

     Written by : smtv Desk | Fri, Aug 14, 2020, 02:19 PM

రేగు పండ్లతో బీరు తయారీ...అదిరిపోయే లాభాలు

రేగు పండు పేరు వినగానే మనకు భోగి పండుగ గుర్తొస్తుంది. పిల్లల నెత్తి భోగి పండ్లు పోయడం మన దగ్గర ఆచారం. సంక్రాంతి ముగ్గులో రేగు పండ్లను ఉంచుతుంటారు. కాస్త తీయగా పుల్లగా, కాస్త వగరుగా ఉండే రేగు పండ్లు భలే రుచిగా ఉంటాయి. కొందరైతే వీటితో పచ్చడి, వడియాలు కూడా పెడుతుంటారు. కానీ వీటితో బీరు కూడా తయారు చేయొచ్చని తెలుసా..? ఆస్ట్రేలియా రైతులు

రేగు పండ్లతో బీరు తయారు చేసి లాభాలను ఆర్జిస్తున్నారు. వివరాల్లోకి వెళ్తే..

మన దగ్గర విరివిగా పండే గంగ రేగు పండ్లు ఇప్పుడిప్పుడే ఆస్ట్రేలియా ప్రజలు పరిచయం అవుతున్నాయి. భారత్, చైనాల్లో ఎక్కువగా పండే రేగు పండ్లను ఆస్ట్రేలియా వాసులు సాగు చేసి లాభాలను ఆర్జిస్తున్నారు. ఆపిల్ పండ్లు తినే అలవాటున్న ఆస్ట్రేలియావాసులు ఈ గంగ రేగి పండ్లు భలే ఉన్నాయే అని తెగ తినేస్తున్నారు. ఈ ఏడాది వర్షాల కారణంగా పంట దెబ్బతినగా, కరోనా వైరస్ కారణంగా పంటను మార్కెటింగ్ చేయడం కుదరడం లేదు. పంట దిగుబడి పెరగడంతో... నాణ్యమైన పండ్లను విక్రయించినా.. కొద్దిగా డ్యామేజ్ అయిన పండ్లను పడేయాల్సిన పరిస్థితి తలెత్తింది.

కానీ బెన్ వాడెల్లో అనే ఆస్ట్రేలియా రైతు విపత్కర పరిస్థితుల్లోనూ వినూత్నంగా ఆలోచించాడు. డ్యామేజీ అయిన రేగు పండ్లతో బీర్ తయారీ మొదలుపెట్టాడు. మొదట వెనీగర్ లాంటిది తయారు చేసి మార్కెటింగ్ చేద్దామని భావించారు. కానీ కొంచెం పుల్లగా అనిపించింది. దీంతో పండ్లను పులియబెట్టి బీరు తయారు చేస్తున్నారు.

ఇలా బీరు తయారు చేయడం ప్లాన్డ్‌గా జరిగిందేం కాదు. కొన్ని తాజా రేగు పండ్లను బకెట్లో వేసి నానబెట్టారు. వాడెల్లో కుమారుడు మార్కస్ మూత తెరిచి చూడగా.. అవి పులిసిపోయి కనిపించాయి. దీంతో తండ్రీ కొడుకులు ఒకరి ముఖం ఒకరు చూసుకున్నారు. ఆ వాసన కూడా బాగుండటంతో ఏదైనా చేస్తే బాగుంటుందని భావించారు. ఒక్క నిమిషం అలా ఆలోచించి.. బీర్ తయారు చేస్తే ఎలా ఉంటుందనుకున్నారు.

రేగు పండ్లతో బీరు తయారు చేయడం కోసం అడిలైడ్‌కు చెందిన బ్రూవర్ లూయిస్ మాస్చ్‌మెడ్ట్‌ను సంప్రదించారు. అప్పటికే రేగు పండ్లను రుచి చూసిన లూయిస్ వాటితో బీరు తయారు చేయొచ్చంటే నమ్మలేకపోయాడు. తండ్రీ కొడుకులు ఎలాగోలా ఆయన్ను ఒప్పించారు. గంటల తరబడి ప్రయోగాలు చేసి.. ఫ్లేవర్ ప్రొఫైలింగ్ చేసి.. రేగు పండ్లతో తొలి బీరు తయారు చేశారు. ఈ బీర్ డార్క్ కలర్‌లో చక్కటి రుచితో ఎంతో బాగుందని లూయిస్ చెబుతున్నాడు.

రేగు పండ్లతో బీరు తయారు చేయడం ద్వారా రైతులకు వాటిని పడేసే బాధ తప్పడంతోపాటు ఆదాయం కూడా సమకూరింది. మరోవైపు బీరు ప్రియులకు మరో కొత్త తరహా బీరు అందుబాటులోకి వచ్చింది. ఈ బీరును ఆస్ట్రేలియా మార్కెట్లో విరివిగా అందుబాటులోకి తెచ్చే ప్రయత్నాలు చేస్తున్నారు.





Untitled Document
Advertisements