క్రెడిట్ కార్డుపై లోన్ మారటోరియం... కొందరికే ఈ బెనిఫిట్

Written by : smtv Desk | Thu, Sep 24, 2020, 11:02 PM

కరోనా వైరస్ దెబ్బకి చాలా మందిపై ప్రతికూల ప్రభావం పడింది. ఆదాయం తగ్గిపోవడం లేదంటే ఉపాధి కోల్పోవడం వల్ల చాలా మంది క్రెడిట్ కార్డు బిల్లులు, లోన్ ఈఎంఐలు కట్టలేక ఇబ్బంది పడుతున్నారు. ఇలాంటి ప్రతికూల పరిస్థితుల్లో దేశీ అతిపెద్ద ప్రైవేట్ రంగ బ్యాంక్ హెచ్‌డీఎఫ్‌సీ బ్యాంక్ తాజాగా తన క్రెడిట్ కార్డు వినియోగదారుల కోసం కొత్త సదుపాయం అందుబాటులోకి తీసుకువచ్చింది.

హెచ్‌డీఎఫ్‌సీ బ్యాంక్ తన క్రెడిట్ కార్డు ఉపయోగిస్తున్న వారికి ఊరట కలిగే నిర్ణయం తీసుకుంది. Loan Moratorium సదుపాయం అందుబాటులోకి తీసుకువచ్చింది. ఇందులో భాగంగా రెండేళ్ల వరకు క్రెడిట్ కార్డు బిల్లు చెల్లించకుండా ఉండొచ్చు. కేవలం క్రెడిట్ కార్డు వినియోగదారులకు మాత్రమే కాకుండా లోన్ తీసుకున్న వారికి కూడా ఇది వర్తిస్తుంది.

బ్యాంక్ వన్‌టైమ్ రిస్ట్రక్చరింగ్ ప్లాన్‌లో భాగంగా తన కస్టమర్లకు ఈ సదుపాయం కల్పిస్తోంది. మీరు క్రెడిట్ కార్డు బిల్లు కట్టలేక ఇబ్బంది పడుతుంటే ఈ ఆప్షన్ ఎంచుకోవచ్చు. క్రెడిట్ కార్డుపై తీసుకున్న లోన్ ఈఎంఐలకు కూడా లోన్ మారటోరియం వర్తిస్తుంది. క్రెడిట్ కార్డు బ్యాలెన్స్‌ మొత్తంపై కూడా లోన్ రిస్ట్రక్చరింగ్ ప్రయోజనం పొందొచ్చు.

అయితే ఇక్కడ హెచ్‌డీఎఫ్‌సీ బ్యాంక్ అందిస్తున్న లోన్ మారటోరియం బెనిఫిట్ పొందాలంటే మీరు బ్యాంకుకు కనీసం రూ.25,000 అప్పు ఉండాలి. అప్పుడు ఈ బెనిఫిట్ పొందటానికి వీలుంటుంది. ఈ ఆప్షన్ వినియోగించుకోవాలని భావించే వారు బ్యాంక్ వెబ్‌సైట్‌కు వెళ్లి లోన్ రిస్ట్రక్చరింగ్ కోసం అప్లై చేసుకోవచ్చు.

ఉద్యోగం చేస్తున్న వారు శాలరీ స్లిప్, బ్యాంక్ అకౌంట్ స్టేట్‌మెంట్ వంటి డాక్యుమెంట్లు సమర్పించాల్సి ఉంటుంది. అదే స్వయం ఉపాధి పొందుతున్న వారు అయితే బ్యాంక్ అకౌంట్ స్టేట్‌మెంట్, GST రిటర్న్స్, ఇన్‌కమ్ ట్యాక్స్ రిటర్న్స్ ITR, ఉద్యమ్ సర్టిఫికెట్ వంటి పత్రాలు అందించాలి. ఇకపోతే బ్యాంక్ రిస్ట్రక్చరింగ్ ఫెసిలిటీ ఎంచుకునే వారి నుంచి ప్రాసెసింగ్ ఫీజు వసూలు చేసే అవకాశముంది.