ఫీజు కోసం నగలు అమ్మేశా : అనిల్ అంబానీ

తాను ప్రస్తుతం సాధారణ జీవితం గడుపుతున్నానని, నగలు అమ్మి లాయర్‌కు ఫీజు చెల్లించానని బ్రిటన్ కోర్టుకు వ్యాపారవేత్త అనిల్ అంబానీ శుక్రవారం తెలియజేశారు. ఈ ఏడాది జనవరి నుంచి జూన్ మధ్య తన వద్ద ఉన్న నగలు అమ్మగా రూ.9.9 కోట్లు వచ్చిందని, అంతకు మించి ఒక్క పైసా కూడా నా దగ్గర లేదని పేర్కొన్నారు. మీ వద్ద విలాసవంతమైన కార్లు ఉన్నాయి కదా అని ప్రశ్నించగా.. అంతా మీడియా ప్రచారమేనని, తన వద్ద రోల్స్ రాయిస్ లేదని, ఓ కారు మాత్రమే ఉందని సమాధానం ఇచ్చారు.

రుణాలు తీసుకున్న మూడు చైనా బ్యాంకులకు 2020 జూన్ 12లోగా 716,917,681 డాలర్లు (రూ.5,281 కోట్లు), కోర్టు ఖర్చుల కింద 75,000 యూరోలు (రూ.7కోట్లు) చెల్లించాలని మే 22న బ్రిటన్ హైకోర్టు ఆదేశించింది. అయితే, ఈ మొత్తాన్ని గడువులోగా చెల్లించడంలో అనిల్ అంబానీ విఫలమయ్యారు. దీంతో చైనా బ్యాంకులు మరోసారి బ్రిటన్ హైకోర్టును ఆశ్రయించాయి.

ఈ కేసులో జూన్ 29న మాస్టర్ డేవిసన్ ప్రపంచవ్యాప్తంగా అంబానీ ఆస్తులు 100,000 డాలర్లు (సుమారు రూ. 74 లక్షలు) దాటినట్లు అఫిడవిట్ ఇవ్వమని ఆదేశించారు. అవి ఆయన పేరుతో ఉన్నాయో లేదో, అవి పూర్తిగా లేదా ఉమ్మడి యాజమాన్యంలో ఉన్నాయా, చట్టబద్ధంగా, ప్రయోజనకరంగా ఉన్నాయా తెలియజేయాలని కోరారు.

తాజాగా, ఈ కేసు విచారణకు వీడియో కాన్ఫరెన్స్ ద్వారా శుక్రవారం భారత్ నుంచే హాజరైన అనిల్ అంబానీ.. తన తల్లికి రూ.500 కోట్లు, కుమారుడు అన్‌మోల్‌కు రూ.310 కోట్ల రుణాలు ఉన్నట్లు తెలిపారు. అలాగే, రిలయన్స్ ఇన్నోవెంచర్చ్ కోసం 5 బిలియన్ల రుణంగా తీసుకున్నట్టు పేర్కొన్నారు. ఈ సంస్థలో తనకు 12 మిలియన్ల ఈక్విటీలు ఉన్నా.. వాటి వల్ల ప్రయోజనం లేదన్నారు.

అనిల్ అంబానీ వాస్తవాలను దాచిపెడుతున్నారని ఈ సందర్భంగా బ్యాంకుల తరఫున హాజరైన బంకిమ్ థంకీ క్యూసీ అన్నారు. రాత్రికి రాత్రే బ్యాంకు బ్యాలెన్స్ తరిగిపోయిందని 2019 డిసెంబరు 31 నాటికి రూ.40.2 లక్షలు ఉండగా.. అది జనవరి 1, 2020కి రూ.20.8 లక్షలకు చేరిందని అన్నారు.

ఇటీవల వరకు భారత్‌లోని అత్యంత ధనవంతులలో ఒకరైనప్పటికీ, 110,000 డాలర్ల విలువైన ఒక కళాఖండాలు తన వద్ద ఉన్నానని అంబానీ ప్రకటించారు. ఈ సమయంలో, టీనా, అనిల్ అంబానీ సేకరణ ఏమిటి? అని ప్రశ్నించగా.. ‘వాటిని నా భార్య సేకరించారు.. నేను ఆమె భర్తగా ఉన్నాను కాబట్టి చెప్పడానికి నా అనుమతి తీసుకుంది’ అని సమాధానం ఇచ్చారు. 2019-20లో రిలయన్స్ ఇన్‌ఫ్రాస్ట్రక్చర్ నుంచి తనకు ఎటువంటి ప్రొఫెషనల్ ఫీజులు రాలేదని, ఆర్ధిక సంక్షోభం కారణంగా ఈ సంవత్సరం ఏదీ ఆశించలేదని ఆయన అన్నారు.