ఐటీఆర్ దాఖలుకు గడువు...జనవరి 10తో ముగింపు

Written by : smtv Desk | Wed, Jan 06, 2021, 04:10 PM

2019-20 ఆర్థిక సంవత్సరానికి సంబంధించి మీరు ఇంకా ఐటీఆర్ దాఖలు చేయలేదా? ఆందోళన చెందవద్దు. ఇన్‌కమ్ ట్యాక్స్ రిటర్న్ ITR దాఖలుకు జనవరి 10 వరకు గడువు ఉంది. దీనికి ఇంకో మూడో రోజులే మిగిలి ఉన్నాయి. సాధారణంగా డిసెంబర్ 31తోనే ఐటీఆర్ దాఖలు గడువు ముగియాల్సి ఉంది. అయితే కేంద్రం పది రోజులు గడువు పొడిగించింది.

పన్ను చెల్లింపుదారులు ఐటీఆర్ దాఖలు చేసేటప్పుడు కొన్ని తప్పులు చేయకూడదు. లేదంటే ఆదాయపు పన్ను శాఖ నుంచి మాకు ట్యాక్స్ నోటీసు రావొచ్చు. ఏ ఏ తప్పులు చేయకూడదో ఇప్పుడు ఒకసారి తెలుసుకుందాం.

1. పలు రకాల ఐటీఆర్ ఫామ్స్ అందుబాటులో ఉంటాయి. ఐటీఆర్ 1, ఐటీఆర్ 2, ఐటీఆర్ 3, ఐటీఆర్ 4 ఇలా పలు ఫామ్స్ ఉన్నాయి. వీటిల్లో మీకు ఏది వర్తిస్తుందో దాన్నే దాఖలు చేయాలి.

2. ఐటీఆర్ దాఖలు చేసేటప్పుడు కచ్చితంగా మీకు వచ్చే ప్రతి ఆదాయం గురించి తెలియజేయాలి. లేదంటే మీకు ట్యాక్స్ డిపార్ట్‌మెంట్ నోటీసులు వస్తాయి. క్యాపిటల్ గెయిన్స్ గురించి కచ్చితంగా తెలియజేయాలి.

3. పన్ను చెల్లింపుదారులు వారి పిల్లల పేరుపై ఏమైనా డబ్బులు ఇన్వెస్ట్‌చేసి ఉంటే.. ఆ వివరాలను కూడా తెలియజేయాలి.

4. ట్యాక్స్ పేయర్లు వారికి ఎన్ని బ్యాంక్ అకౌంట్లు ఉన్నాయో కచ్చితంగా చెప్పాల్సిందే. క్లోజ్డ్ అకౌంట్లు, డార్మంట్ అకౌంట్ల గురించి తెలియజేయాల్సిన పని లేదు.

5. ఫామ్ 26ఏఎస్‌లో టీడీఎస్ వివరాలు ఉంటాయి. ట్యాక్స్ పేమెంట్ వివరాలు కూడా ఉంటాయి. ఐటీఆర్ దాఖలు చేసే ముందు టీడీఎస్, ట్యాక్స్ పేమెంట్లను ఫామ్ 26ఏఎస్‌తో సరి చూసుకోవాలి. ఇన్‌కమ్ ట్యాక్స్ డిపార్ట్‌మెంట్ సైట్ నుంచి 26 ఏఎస్‌ను డౌన్‌లోడ్ చేసుకోవచ్చు.

6. విదేశీ ప్రయాణాల కోసం రూ.2 లక్షలు పైనా ఖర్చు చేసే వారు, కరెంట్అకౌంట్‌లో ఏడాదిలో రూ.కోటికి పైగా లావాదేవీలు జరిపేవారు, కరెంటు బిల్లు ఏడాదిలో రూ.లక్ష దాటితే.. కచ్చితంగా ఐటీఆర్ దాఖలు చేయాలి.