'కేసీఆర్‌ను ఏమైనా అంటే నాలుక చీరేస్తాం బిడ్డా’...బండి సంజయ్‌కు వార్నింగ్

Written by : smtv Desk | Wed, Jan 06, 2021, 07:16 PM

సీఎం కేసీఆర్ టార్గెట్‌గా విమర్శలు గుప్పిస్తోన్న బీజేపీ రాష్ట్ర అధ్యక్షుడు బండి సంజయ్‌కు ప్రభుత్వ చీఫ్ విప్ దాస్యం వినయ్ భాస్కర్ వార్నింగ్ ఇచ్చారు. వరంగల్ నగరానికి వచ్చిన సంజయ్.. తొండి మాటలు మాట్లాడుతున్నారని మండిపడ్డారు. తెలంగాణ ఉద్యమం జరిగినప్పుడు మీరంతా ఎక్కడున్నారని బీజేపీ నాయకులను వినయ్ భాస్కర్ ప్రశ్నించారు. తెలంగాణ కోసం కేసీఆర్ ప్రాణ త్యాగానికి సిద్ధపడిన విషయాన్ని గుర్తు చేశారు.

తెలంగాణ కోసం తామంతా రాజీనామా చేస్తే..? కిషన్ రెడ్డి, బండి సంజయ్ ఎక్కడున్నారు? అని వినయ్ భాస్కర్ ప్రశ్నించారు. కేటీఆర్‌ను అకారణంగా అరెస్ట్ చేసినప్పుడు మీరెక్కడున్నారని నిలదీశారు. తెలంగాణ ప్రజల ఆకాంక్షల మేరకు కేసీఆర్ సర్కారు... సంక్షేమ పథకాలు, అభివృద్ధి పథకాలతో ముందుకెళ్తోందని.. అనేక సంస్కరణలు తీసుకొస్తోందన్నారు.

‘‘నీది నోరా..? మోరా..? మా ఉద్యమ నాయకుణ్ని ఏమంటవ్.. తెలంగాణ కోసం ప్రొఫెసర్ జయశంకర్ చేసిన త్యాగాలు నీకు తెలుసా..? జీవితాంతం ఆయన తెలంగాణ కోసం తపించారు. మాలాంటి వారిలో ఉద్యమ స్ఫూర్తిని రగిల్చారు. తన ఆస్తులను బడులకు, గుడులకు అర్పించారు. అలాంటి వ్యక్తి గురించి బీజేపీ నాయకులు చిల్లర మాటలు మాట్లాడుతున్నారు’’ అని వినయ్ భాస్కర్ మండిపడ్డారు.

ఢిల్లీ నుంచి ఒక్క పైసైనా తీసుకొచ్చావా..? అని బండి సంజయ్‌ను టీఆర్ఎస్ నేత ప్రశ్నించారు. వేలాది మందికి ఉపాధి కల్పించే టెక్స్‌టైల్ పార్క్‌కు నిధులిచ్చారా..? మిషన్ కాకతీయకు ఒక్క పైస అయినా ఇచ్చారా..? అని నిలదీశారు. కాళేశ్వరానికి జాతీయ హోదా ఇచ్చారా..? అని ప్రశ్నించారు. వరంగల్‌లో వరదలు వచ్చినప్పుడు నువ్వు ఎక్కడున్నావ్? అని బండి సంజయ్‌ను ప్రశ్నించారు. ‘కేసీఆర్‌ను ఉద్దేశించి పిచ్చి పిచ్చి మాటలు మాట్లాడితే ఖబడ్దార్. ప్రొఫెసర్ జయశంకర్, కేసీఆర్‌ను ఏమైనా అంటే నాలుక చీరేస్తాం బిడ్డా’.. అని బండి సంజయ్‌కు వినయ్ భాస్కర్ వార్నింగ్ ఇచ్చారు.